是次旅行，喺準備不足下，戰戰兢兢咁出發！
今次搭零晨機，我同拾爺就9點半就到機場，check in後，就入lounge食嘢。今日個lounge好多人，我哋搵咗一陣，要等人走就有位坐……食食食，又係食魚蛋粉，不過，今次得米粉冇河粉……我同拾爺都覺得河粉好味啲。雞扒冇味又嚡口，沙律菜又唔夠新鮮，我最欣賞係個蘑菇湯，菇味濃，我飲咗兩、三碗。
食到差唔多，我哋就行去閘口等上機。第一程由香港飛杜拜要成差唔多8個鐘，我真係好驚！飛機呢樣嘢，我真係搭幾多次都咁驚！如果唔係我爛玩，我係唔會上機架！呢程機部機唔太穩定，已經係第三年我有呢程感覺，總覺得由香港飛杜拜或杜拜飛香港呢程，氣流多，搞到我睇唔到戲……呢8個鐘我都係閉目養神多，雖然好攰好眼瞓，但瞓唔到……坐我隔離個香港女人就正，瞓足全程咁滯！講開呢個女人，佢上機後，即刻放個背囊喺前座凳底，但佢仲有另一個手袋要放地下，前座凳底冇位，佢又唔放個friend嗰邊，就咁放地上……空姐見到，用英文提佢放凳底，佢唔郁，於是我同佢講手袋要放凳底，佢答我﹕「我知架喇！」當然，佢知，但唔做囉！其實佢知唔知點解手袋要放凳底﹖唔放好啲袋，飛機遇上嚴重氣流會發生咩事﹖！好憎啲人咁自私！
到達杜拜，過境後，我哋就去lounge，今次個閘口喺B區，所以我哋去B區嘅lounge，一入去，已經覺得個lounge差過A區嗰邊，就連啲staff都衰啲。明明我哋嚟先，佢就serve後面嘅人，我出聲，佢哋就yes yes，繼續要我等！Crazy！
雖然肚餓，但對lounge嘅嘢食實在提唔起興趣……喺lounge到hea到夠鐘，就去閘口。呢程機我哋有窗口位坐，仲要係第一排，show飛時，個空少話我哋有正位，但係……我哋等緊部機take off時，發覺上面不停滴水……空姐過要等部機run到咁上下，起飛後，就唔會再滴喎……咁嘅位都叫正﹖
呢程機我終於瞓到，但唔係好耐，瞓到夠，就睇戲。睇咗The Hunger Games: Mockingjay – Part 1同深夜食堂，仲完成埋上年未睇完嘅The Hobbit: The Desolation of Smaug，兼開咗少少The Hobbit: The Battle of the Five Armies。
落機後，先拎行李，再行去information到問吓去酒店嘅交通，之前上網搵資料A1，再轉metro，咁我當然跟information嘅教路啦。
跟住機場嘅指示牌，終於搵到Aerobus A1，即刻排隊等上車。一去到，就有巴士開出，不過，巴士公司隨即再出車，估計佢哋會因應乘客數量而調整班次。上車買飛，每人€5.9，兩人合共€11.8 (我後嚟上網先知return ticket有效期為15日，其實我哋當時可以買埋，來回只需€10.2，叫做平少少)。
Aerobus A1
我哋要搭到總站 — Plaça Catalunya。車程大概35至45分鐘，落車後，我哋問一問司機metro站個方向，就拖住篋過馬路。好唔好彩地，個入口係冇電梯嘅，我哋要捧行李落樓梯……落到metro，即刻搵部ticket machine買張T10飛 (€9.95)。T10飛係之前上網睇人啲blog嘅發現，可以喺同一個zone內搭10次，比起每次買single trip平少少，而且，因為西班牙嘅metro只需入閘插飛，出閘唔駛，所以我哋只係買一張T10飛share嚟用。
由Catalunya站搭去Glòries站，兩者只係相差4個站，出閘後，行去出口，發覺部escalator壞咗……真黑仔，又要自己捧篋……上到地面，向前行，好快就見到間酒店喇！
Check in後，我哋即刻上房settle down，我哋住4樓，房間距離lift口頗遠，唔錯，唔怕嘈呀！(詳見Hotel Silken Diagonal Barcelona)
本來plan咗今日check in後就去Temple Expiatori De La Sagrada Família嘅，因為佢同酒店嘅距離係within walking distance，但到步後，我見天色陰沉，估計影相出嚟效果唔好，所以改為去Kiosko Universal醫肚，再行La Rambla。
搭metro到Liceu站 (本來唔想轉線，想搭至Catalunya再慢慢行去，但早咗落車，就索性轉埋線佢。)，出去行咗陣就見到Mercat de Sant Josep de la Boqueria，Kiosko Universal就係喺個market入面。
喺market邊行邊搵Kiosko Universal，最後行咗一圈先搵到 (詳見Kiosko Universal)……呢個market超多遊客，商舖種類都唔少，有賣水果嘅，賣水果嘅又賣埋果汁，啲果汁都唔平，細細都索價€1，大杯啲又或者要mixed fruit嘅，就要€2或以上。除咗賣水果，有啲賣ham，有賣seafood，亦有賣糖同olive嘅，都幾多嘢睇。我同拾爺亦喺到買咗扁桃，好平，€1.5有成10個咁多！
呢到好多水果檔，水果檔兼賣果汁。
好多olive！
蛋都有好多種俾人揀！
好多款ham！
雖然我唔明點解街市會有賣糖嘅出現，但呢到都有好幾檔，而又真係有人買！
啲魚好大條！
離開market，就沿住La Rambla行，呢條咁出名嘅購物大道卻叫我哋非常失望，完全冇特色商舖，大多都係賣A貨巴塞波衫，又或者係I Love Barcelona嗰啲tee嘅hea爆手信舖……真係叫我倆越行越眼瞓。最後係咁易行哂兩邊，就行去Catalunya站到搭metro番酒店。
是日因為太晏食lunch，加上搭咗兩程機，我哋都好攰，冇力再出去覓食，所以夜晚只係食咗由香港帶嚟，舊生送我嘅Jenny’s Bakery嘅曲奇餅、之前買落嘅紫心蕃薯乾同埋頭先買嘅扁桃當晚餐。
啲扁桃好甜好juicy，性價比高到爆呀！
80後窮遊世界 