位於Venice主島嘅酒店，位置頗難搵……但價錢算相宜，原以為咁平嘅住宿早餐會冇啖好食，但turn out早餐選擇都唔少，仲有鮮榨橙汁供應，性價比都幾高！
進入酒店前，先要入閘。
酒店outlook頗殘舊，大門好重，要好大力先推得開……
進入大樓後……
酒店reception位於3樓，住客可選擇搭老爺lift，又或者行樓梯。
Reception
Reception desk旁係洗手間
洗手間非常乾淨
Reception呢層都有房間出租。
呢層嘅盡頭係用餐區，裝修典雅。
見到呢層嘅裝修同我book房時所睇到嘅唔同，modern得多，內心暗喜，點知……原來我哋間房唔係呢層……
我哋嘅房間要再上一層……
原來我哋訂嘅房係要同人share bathroom架！我book時都唔知添……好彩，今晚全層得我哋兩個住，所以間bathroom都叫係private嘅，只係……佢唔係黐住我哋間房，要行多幾步去啫。
我哋間「劏房」，面積都夠大，可以開到兩個篋，裝修就……預咗老土架喇。
呢層有兩張sofa
本來嘅shared bathroom
呢個洗手間嘅設計其實都有啲奇怪……去相！
生得高啲男性去洗手間要低頭……
一定要坐低沖涼……
早餐係buffet breakfast，選擇比我想像多！
用餐區景觀好好，我哋可以望住條河食早餐。
Bread, ham, yoghurt, fruit, fresh orange juice, etc, 選擇都幾多！
酒店老闆其實好nice，因為我之前through Booking.com reserve房間，但唔知點解佢哋話我張credit card過唔到數，我再reserve多次，收到酒店嘅email，以為ok咗，點知原來佢封email下面先係正題，係話仲未ok……直到入住前一、兩 日，我人在Ljubljana先再收到email話我個reservation未ok。我就直接同酒店聯絡，對方好好，話會照留房俾我。
不過……酒店負責早餐同清潔嘅大嬸就好唔友善！我同拾爺入去食早餐時，被要求將背囊放到sofa位置，唔可以跟身，我初時以為佢怕我哋撞到啲傢俬， 因為我哋坐嘅位置一定唔會妨礙到他人出入，後來卻見佢容許其他人嘅手袋 (size都唔細) 跟身，我懷疑佢驚我哋帶出食物！因為餐枱上係有寫明唔可以帶出嘢食嘅。
我哋嘅背囊就要放sofa，人哋個袋就可以放喺張凳……
餐廳有鮮榨橙汁供應，不過就要住客自己榨，我見另一對couple棄用枱上嘅小杯，自己去拎隻大啲嘅，就跟人咁做啦，其實大杯剛好裝到一個橙嘅橙汁 份量，good fit呀！點知……當我再榨橙汁時，個大嬸走嚟話我，佢講嘅意大利話，我一句都聽唔明，但從佢個眼神、表情、聲調、語氣、肢體語言等等，我知佢鬧緊我！佢 仲拎咗隻細杯出嚟，意思係要我用細嘅，唔可以用大嘅！我好無奈，我鬼知幾時用細幾時用大咩，我見其他人咁用，我咪跟囉，又唔見佢鬧其他人，就係鬧我……佢 咁講，我咪用番隻細杯囉，最多出多嚟一次去榨，只係……我同拾爺都唔明，佢唔俾人用大杯，咁放啲杯出嚟做咩﹖
被人話完，心情當然唔好，出去拎嘢食，當我拎緊嘢食時，個大嬸走嚟拍我膊頭，再講一次叫我用細杯，我真係好嬲！第一，我已經轉細杯！第二，我當時係 拎緊嘢食，唔係榨緊橙汁，佢咁做即係assume我會再拎大杯去榨橙汁！我覺得佢做嘅一切，都係衝著我呢張亞洲臉孔而來，因為，全個用餐區嘅食客當中，佢 只係不停針對住我！
我同拾爺嘅房間喺樓上，唔想特意上一層去洗手間，於是就去呢層reception desk旁嘅洗手間，點知大嬸又話我哋，仲指住個牌重複「Private」呢個term，但我哋噚日check in時，負責人明明話我哋可以用呢個洗手間架！
我唔同個大嬸嘈，唔係怕咗佢，係佢根本唔識講英文，同佢理論都冇用，本來想check out時向負責人反映，我真心覺得佢歧視我哋亞洲人！可惜，當時負責人有朋到訪，無閒理會我哋……
酒店評價﹕
酒店環境﹕寧靜。
酒店裝修﹕我哋住嗰層就老土……
房間類型﹕Double Room
房間景觀﹕冇景觀可言，個窗高到你唔會望出去……
房間設備﹕基本設備如電視、冷氣都有，仲有wifi，但唔太work囉……
浴室總評﹕Description冇寫到嘅shared bathroom……
食水供應﹕冇……
酒店早餐﹕Buffet breakfast
接送服務﹕冇
酒店價錢﹕€95 (另加 €5 tax)
性價比﹕一般
總評價﹕唔怕受歧視，唔怕難搵，都可以一住。
80後窮遊世界 