因 為呢個trip本來就係就因為爸爸嘅心血來潮而成行嘅,所以大妹去買船飛時,已經冇哂噴射船之餘,仲只買到金光飛航嘅8點半時間……同拾爺6點就起身,7 點就出門口,去到信德中心,見到細妹坐咗喺Starbucks,原來佢早到嘗試將爸爸嘅老人飛,加小王子嘅小童飛換做成人兼轉日子,但因為爸爸張去程飛距 離出發時間不足一小時,所以轉唔到日子……但細妹就成功將爸爸嘅回程轉日子,再將小王子嘅飛加錢換成人,再轉日子。細妹話因為我哋紅日出發價錢較貴,佢按 媽媽要求換做下個月嘅平日船飛後,船飛價錢平咗,船公司仲退番錢俾我哋添。
各人齊集Starbucks後,就一齊過關。媽媽本來仲想嘗試放 售爸爸張去程飛,我哋即時stop佢!過關後,我哋就去上船,大妹收集眾人嘅船飛去劃位,等到大部份人都上船後,我哋亦上船喇。其實我同肥仔都屬怕搭船之 人,尤其肥仔,聞到海水味已經唔舒服,我就架船只要郁多兩吓,都頭暈……本來呢個旅行係為咗係陪爸爸嘅,所以「孝」字行先下,我哋點都要撐住,但而家主角 卻嚟唔到……我同肥仔當然覺得要捱呢程船就變得唔抵喇……
上船後,大妹就話架船有陣味,搞到原本已經驚暈船嘅我,更加疑神疑鬼……我坐低 後,就拎部Ipod出嚟塞住對耳仔,雖然噚晚夜瞓,今朝早起,個人好攰,但呢程船我卻瞓唔著……香港個海真係填到越嚟越細,搞到架船好「浪」……好彩,後 嚟架船去到澳門嗰邊定番哂,但我搭完呢一程船,個樣卻殘咗好多……金光飛航果然唔夠噴射船定……
架船一埋岸,我就即時捉住拾爺上岸,然後, 大家一齊行去過關。由於媽媽、我、肥仔、大妹同細妹都有澳門身份證,我哋可以去澳門人通道到過關。妹夫之前申請咗e道,雖然佢手持香港身份證,但都可以用 機過關,大妹去咗陪佢,我就好無情咁撇低拾爺自己一個過關,同媽媽佢哋去咗澳門人通道,我哋幾個好快就過關喇,然後大妹同妹夫都到埋,等咗一陣拾爺先出到 嚟。
離開氹仔碼頭,我哋出去搵車出市區。我同拾爺擺明唔識路,大妹同肥仔熟路啲,但佢哋一時又話拾爺呢間酒店嘅車,一時又話搭另一間……企喺碼頭門口幾分鐘都未有決定……好彩後嚟見到某架van仔去到我哋下榻嘅酒店,於是一行7人齊齊跳上車,過番去澳門半島。
落 車後,我哋就行去新麗華酒店。呢間酒店係爸爸指定要入住嘅,貪佢夠方便……其實早於2012年嗰次家族澳門遊,我哋已經住過一次,所以,我想住吓另一 間……一行去counter,交低voucher,我明明係講廣東話嘅,但對方就對我講一大堆國語……我用廣東話回應佢,佢先講番廣東話……我哋book 咗4間房,但當時只係11點幾,未到可以入住時間,不過酒店都俾到兩間房我哋,我哋就先上房放低嘢,食個lunch番嚟先攞埋另外兩間房喇。
拎到嘅係兩間twin bed嘅房,我哋大伙放低行李後,就去食lunch。本來我係想去六棉酒家飲茶,但因為太餓,等唔切再搭車番去氹仔,所以就行去三元粥品專家,陪媽媽食佢話一定要食嘅肉丸粥。
行到去三元粥品專家,要排隊……肥仔太肚餓,過咗對面鉅記買葡撻,成MOP 9個,但唔好食……
排 排吓隊,大妹發現店舖貼咗張紙寫住營業時間至11點半,但當時已經差唔多12點喇……冇人趕我哋走,我哋就照排,排排吓,後面多咗兩個男人添。隔咗一陣, 有人出嚟數人數,再同後面兩個男人講,叫佢哋同再嚟排隊嘅人講冇粥供應。如是者,我哋安全有粥食。小店先安排媽媽同細妹入去坐,然後,我哋幾個都可以入埋 去坐喇。(詳見三元粥品專家)
離開三元粥品專家,我哋都未係好飽,於是,我提議到賣草地里嘅麥花臣美品甜品屋買雪糕食。由媽媽帶路,行到去 賣草地里一頭,眼利嘅大妹已經見到間甜品屋嘅招牌。甜品屋喺巷仔入面,我哋一轉入去,已經見到有好多人排哂隊……以為又要大排長龍,打算放棄之際先發現啲 人排緊另一間店舖,我哋於是快速買走3杯雪糕。(詳見麥花臣美品甜品屋)
食完雪糕,我哋行去盧家大屋。媽媽唔太認得路,見到有兩個警察,於是就去問路,個女警同我哋講盧家大屋好遠要搭車先去到。媽媽聽完後,唔信佢,繼續憑記憶去行,終於,行多幾步就到。我哋都不禁問句﹕「乜唔係要搭車先去到架咩﹖!」
盧家大屋其實好細,只係分3小部份供人參觀,基本上唔睇資料,頂到盡15分鐘乜都睇完!
離開盧家大屋,媽媽提議行去荷蘭園禮記食雪糕。
盧家大屋出面嘅食街,好多人排隊買牛雜、車仔麵,我好懷疑呢到嘅小食檔係咪真係好食到咁,天時暑熱排咁耐去買嚟食,細妹話因為廿蚊一兜麵好平喎。
行到去禮記,即時入去食雪糕。(詳見禮記雪糕飲冰專家)
因 為細妹肚餓,媽媽就提議行去紅街市嗰頭搵食,大妹其實唔想行,話好遠,但我哋其他人都唔介意行,於是大伙就咁行過去。點知……行到途中,媽媽帶細妹去食緬 甸嘢……我哋都冇興趣,話喺出面等細妹,細妹唔知係唔食緬甸嘢,定唔想我哋喺出面等,於是就出番嚟話唔食……去到紅街市,根本就冇嘢好食……大妹同妹夫買 豬腳薑食,細妹本來想幫襯隔離麵檔,但個亞佰唔憂做咁,細妹問價時,佢答到極為晦氣,細妹嬲到走開唔幫襯。細妹之後行入麵包舖揀包,但又揀唔落手,最後去 咗買糭 (MOP 9)食,細妹話幾好味。
紅街市嘅豬腳薑檔,大妹買咗一兜豬腳薑,盛惠MOP 40。
離 開紅街市,大家問媽媽想去邊,佢就叫我哋跟住佢,點知……跟到佢出番啲大馬路時,媽媽停低問我哋去邊好……頭先明明話信佢就跟住佢,但其實佢自己都唔知去 邊……其實澳門咁細,我哋又由細嚟到大,仲有邊樹好去﹖過嚟都係為咗探亞姨,但亞姨又叫我哋唔好清明正日搵佢,所以聽日先可以去……根本一開始就唔需要玩 個三日兩夜!
拾爺偷影我哋企哂喺到唔知去邊嘅情景。
最後,大妹提議玩「命運遊戲」,行去最近嘅巴士站,架巴士去邊,我哋就去邊!
行 到去巴士站後,第一架嚟嘅巴士係去路環,巴士一到站,我哋就跟其他人一齊行去搭,但因為人太多,架巴士又太細,大妹眼見啲位所剩無幾,就話唔上,佢唔想 企。於是,我哋大家又急急撤退。然後,另一架巴士嚟到,係去氹仔嘅,我哋又趕去搭,點知,媽媽話唔要去氹仔,於是,我哋又急急撤退。等等等,嚟咗多兩、三 架去氹仔嘅巴士,媽媽都唔俾上,佢唔想去氹仔……然後,有架去黑沙嘅巴士到,大妹話呢架應該經路環,媽媽話會貴啲,但大家覺得可以睇吓價錢先,媽媽第一個 上車,一見到車費成6個幾,就話貴!司機叫媽媽坐後面架巴士,媽媽落番車,我哋正打算行去搭後面架巴士時,先發現架巴士係去氹仔嘅,好明顯頭先個司機想賣 甩媽媽,所以老點佢上後面架車。喺巴士站玩咗幾轉衝去巴士,但唔上車嘅「遊戲」後,我哋覺得咁落去都唔係辦法,媽媽要去嘅路環其實只有葡撻食,但冇嘢 玩……要食葡撻,其實威尼斯人都有,於是大家就說服媽媽去氹仔,起碼有條官也街行吓,行到夜晚再喺嗰頭食葡國菜做晚餐,媽媽同意後,我哋終於上到巴士。
上到巴士後,大家講番頭先喺巴士站衝咗幾次巴士,但又唔上車嘅事,都忍唔住大笑,真係好傻!
我哋就係喺呢個巴士站到「玩」咗好耐,細妹叫我一定要影相,紀念呢一刻!
去到氹仔,喺官也街行咗一轉,搵到大妹上次嚟幫襯過嘅葡國菜餐廳,影低佢個電話之後,就行去威尼斯人。今日係公眾假期嘅關係,官也街好鬼多人,多人到我哋都唔想再行……
行到去威尼斯人,我哋先入賭場,我要去洗手間,細妹佢哋想拎水飲。一行到去門口,細妹就被人要求出示身份證。入到去後,大伙先陪我先搵洗手間,之後就齊齊搵水。大妹玩咗舖老虎機,賺咗幾蚊!之後,大伙一齊去搵安德魯餅店,途中要進出贈場,今次到我被要求出示身份證……我總覺得啲staff係random咁要求人哋出示證件,因為我拎俾佢睇時,佢都冇點睇就放行。
行過運河,有一男子喺gondola上向女友求婚……其實……我真係唔太buy公開求婚呢樣嘢,仲要喺條咁假嘅運河同gondola上……
都搵咗幾耐先搵到安德魯餅店,去到又係大排長龍……
分兩條人龍排,好彩我哋人多,兩條排哂,邊條快幫襯邊到!(詳見安德魯餅店)
食完葡撻,我哋見行番去官也街都應該差唔多6點,可以食dinner,於是就行番過去。
去到餐廳咁啱仲有一張枱,可以坐低食晚飯喇。(詳見露素餐廳)
食完飯,大家都唔太飽……行去誠昌攞位,但要等成45分鐘……大妹本來就唔贊成去食,佢話唔想一次過食哂所有餐廳,聽日就會唔知食咩好喎……於是,佢哋就去咗買豬扒包,我同拾爺雖然都未飽,但又唔想食豬扒包,所以冇買到。大家食完豬扒包後,就番酒店休息。
番到酒店,可以攞到房啦!(詳見新麗華酒店)
是晚可以同拾爺早早休息,yeah~~