位於中山站嘅超人氣食店，長期現人龍！以現殺鰻魚為賣點！
「肥前屋」前嘅人龍！
餐廳環境，感覺好似日式大飯堂。
入座前已經點好嘢食，可惜是日烤鰻肝賣哂……
枱上有調味料，食客可自行為飯餸加料，若想飲荼，就得自己去斟。
隨鰻魚飯附送嘅麵豉湯
鰻魚飯 (大) (NT$480)﹕好普通嘅鰻魚飯！唔明點解咁多人為咗佢而大排長龍，唔明點解佢可以收呢個價……雖然餐廳標明所採用嘅係現殺鰻魚，而非冷凍鰻魚，但食佢個飯，真係食唔出有幾新鮮……
餐廳評分﹕
食物：一般
服務：一般
環境：一般
衛生：一般
價錢：一般
性價比﹕低
總評價﹕名過其實！
位於永康街一帶，除咗呢間舖外，利樂嗰邊都有分店，而且呢到附近都有一間「小隱私廚」，只係「小隱私廚」舖位好細……
餐廳外觀
店員送上點菜紙一張，但內裡卻搵唔到我想點嘅菜……一問之下先知，原來今日樓上有人包場，所以店舖先會開，但菜式就有所限定……想食嘅涼拌苦瓜、 胭脂蝦、紫菜蝦卷、午魚一夜干同剝皮辣椒雞都冇得試……就連另一塊板上寫嘅「天天有魚」嘅魚類都冇得供應……只有干貝肉燥飯同蔥香豬油拌飯……
問店員有咩介紹，佢指勻成張點菜紙咁滯……因為大家都唔太肚餓，所以只係點咗好少嘢食，但就等咗好耐店員先送上……
我哋冇點過嘅「涼拌龍鬚菜」……
店員拎番走碟菜之後，又要呆等一輪，先送上第一道菜。
虱目魚粥 (NT$120)﹕點俾爸爸食嘅，佢話覺得啲粥都尚算清甜，但啲魚就好嚡……雖然我都有食少少，但我真係食唔出清甜，不過，我太唔舒服，所以都冇認真去味嚐，好難去品評呢道菜。
扁魚滷白菜 (NT$195)﹕唔覺得有咩咁特別，反而我嫌佢太油。
蔥香豬油拌飯 (NT$25)﹕因為太唔舒服，只係食咗一小啖，冇試真，但拾爺就話唔覺得佢有咩咁特別。
干貝肉燥飯 (NT$45)﹕好好食！雖然我病到味覺遲頓，但都覺得呢個飯好食！我鍾意佢用嘅米，粒粒分明又有咬口，剩係佢，已經值得我再番嚟食多次！
埋單NT$385。
餐廳評分﹕
食物：好！
服務：一般
環境：一般
衛生：一般
價錢：一般
性價比﹕高
總評價﹕一定要試！
位於忠孝敦化站，以鬆餅聞名，由日本打入台灣嘅café。
餐廳外觀
一入去就有位，lucky！
餐廳環境
餐廳都算大，除咗出面之外，內裡都仲有sofa位。
坐低後，我哋即時拎menu睇，心知爸媽對甜食興趣唔算大，當時時間又尷尬，食得太飽，夜晚就冇戰鬥力去試其他餐廳，於是就決定四個人點三個餐，再加一杯嘢飲。
焦糖覆盆子鬆餅 (NT$290)﹕味道唔錯，個鬆餅真係幾鬆軟。
抹茶拿鐵﹕拾爺嘅嘢飲，單點NT$180，跟餐就要補NT$20。
Waitress送上拾爺嘅嘢飲後，先俾時間我哋影相，之後就走嚟示範點樣開抹茶。
抹茶打發後，可以就咁飲，又或者加cream或黑糖，逐樣上，就可以試到三種唔同嘅味道。
為咗影大合照，我哋遲遲唔開始食嘢，叫咗個waitress幫我哋影相，佢卻一直叫我哋等等……等佢慢慢執枱，再搞吓呢樣搞吓嗰樣……等到我好唔耐煩……想叫其他人幫手揸機，明明見到有人得閒，對方明知我哋需要幫忙，卻故意唔show我哋，慢慢執枱……或許台灣嘅文化就係咁樣，但我真係接受唔到當冇其他客等住要坐嗰張枱時，個waitress都寧願慢慢執完張枱，然後，再搞其他嘢，見我哋不停望住佢，佢先無奈地走嚟幫我哋hea影咗張最後都唔要得嘅合照囉！我唔係話入嚟俾錢食嘢大哂，但舖頭當時真係唔忙，點解唔可以友善地幫人影張相呢﹖！對佢嚟講，可能我嘅要求無聊，咁嘅地方都要影相，但同爸媽嘅合 照，對我嚟講每一張都係好珍貴架！
洋甘菊﹕爸爸嘅嘢飲，單點NT$160，跟餐唔駛補錢。
玄米茶 (抹茶風味)﹕媽媽嘅嘢飲，單點NT$180，跟餐就要補NT$20。
抹茶漂浮﹕我嘅嘢飲，單點NT$180，跟餐就要補NT$20。嚟呢到就係為咗佢！上網見有人飲過，覺得好得意。如果揀熱飲，餐廳就會俾奶我去溝抹 茶，但揀凍飲就好特別，會有兩球雲呢嗱雪糕。其實味道方面，唔會因為嗰兩球雪糕而飲到好濃嘅雲呢嗱味，因為抹茶個 味太強，但呢種配搭好有趣，所以我好想試！
蘇芙蕃厚鬆餅 (NT$250)﹕呢個係W size，如果揀 S size，只得一層，價錢亦只相差NT$30，所以拾爺要夠兩層。但其實……爸爸食得唔多，我哋三個人去完成佢，都有難度……個鬆餅邊位幾脆，但成個鬆餅就略嫌太乾身……
HONOLULU 熔岩鬆餅 (NT$290)﹕見佢係台灣限定，於是點嚟試試。其實佢只係多咗奶油嘅蘇芙蕃厚鬆餅，不過因為係奶油，所以食時就唔會好似食蘇芙蕃厚鬆餅時咁，覺得咁乾，而且邊位仍然予人脆口之感，所以呢個甜品都幾唔錯。
喺杏桃鬆餅屋到hea咗一個鐘就埋單走人，盛惠NT$1150。店員附上一張意見書，因為我嬲呢到頭先要我等咁耐先嚟幫我hea影一張最後都唔要得嘅相，於是就喺意見書上寫上我嘅不滿。仲圈咗唔會再嚟幫襯嘅option，埋單時將意見書放俾cashier。離開餐廳，喺出面影相張後，正打算走人，點知個cashier追出嚟問我頭先封意見書係咪我寫，我直意不諱，對方就向我道歉，話會多加注意。呢個店員態度誠懇，幫間舖頭加番分，不過，我都係唔會再 番轉頭幫襯。一嚟，台北我已經嚟第5次，有時間，我會想去其他國家再唔係都會揀中部同東部嚟玩，二嚟，呢到啲嘢又唔係特別好食，就算真係再去台北，我都會 去試吓其他餐廳啦。
餐廳評分﹕
食物：一般
服務：中下
環境：中上
衛生：一般
價錢：一般
性價比﹕一般
總評價﹕唔試唔可惜！
以平價海鮮吸引遊客嘅上引水產，除有超市供客人購買海鮮、刺身、壽司或其他食材外，仲有立身區、外賣區同餐廳。我哋冇特別選定餐廳訂位，所以只係去咗立身區去外賣區大快朵頤。
立食區
等緊嘅時候，我哋已經點咗兩個海鮮拼盤，本來仲想要海膽，但已賣光……其時都未夠12點……
餐枱下有供食客放置隨身物嘅地方。
最先送上嘅，係哥哥點俾小王子嘅魚湯。
隨海鮮拼盤附上嘅沙律，啲魚生唔多新鮮……
海鮮拼盤，賣相唔錯，但當中嘅海鮮一啲都唔新鮮……要排咁耐去食，仲要企喺到食，唔值！Frankly，就算有得坐同唔駛排，我都唔會專登搭車嚟食，因為真係一啲都唔鮮甜，價錢又唔係特別平……
哥哥嫌唔夠食，就再點多個親子丼，成百蚊港紙一個飯，我同大妹都覺得唔抵……
喺立食區食完兩個海鮮拼盤，大家意猶未盡，於是就決定喺超市內掃嘢食，一輪狂風掃落葉後，大家集合喺超市外嘅外帶立食區到再開餐！
一啲都唔好食！
爸爸覺得好食，但我覺得一啲都唔鮮甜……
愛吃魚嘅妹夫同爸爸都買咗鯖魚。
一啲都唔好食嘅海鰻……
大妹真豪爽，NT$60一塊嘅可樂餅，一口氣買成三塊！我覺得好貴！而且又唔特別好食……
餐廳評分﹕
食物：一般
服務：一般
環境：一般
衛生：一般
價錢：一般
性價比﹕一般
總評價﹕名過其實！
2009年同拾爺無意中發現嘅餐廳，嘢食之美味，足以令我哋食足三餐！今次難得同屋企人遊台，當然帶佢哋嚟飽食一頓啦！
餐廳名，你話點打呀﹖！
坐低後，我同拾爺第一時間點「路邊野雞」，然後再問店員有咩介紹，仲拎份menu俾我哋，就話全版都係推介，於是我哋就跟住版推介嚟點。叫咗﹕
香酥皮皮挫 (NT$180)﹕好油好熱氣……
破卜子炒山蘇 (NT$160)﹕店員話呢個係台灣菜，味道嘛……好一般……
冠軍滷肉飯 (NT$40 x 3)﹕以前食覺得好正！而家再食，唔知係因為有咗expectation，定係佢真係退步咗，我覺得啲肉太肥，亦太油喇……
羊肉沒了 (NT$180)﹕好羶好熱氣！
三杯田雞 (NT$350)﹕好普通……
路邊野雞 (NT$160)﹕仍然係咁好食！外層脆，內裡唔嚡唔乾，醬汁酸味味，非常開胃！因為我同拾爺太鍾意食，所以多點咗一份。
蒜泥鮮蚵 (NT$180)﹕好普通！
麻油松阪豬 (NT$200)﹕最搵笨之作！普通到不得了，份量卻叫人食又嫌嘥quota，唔食又嘥錢……
蚵仔湯 (NT$60)﹕爸爸讚清甜，我就覺得好淡……
百花油條 (NT$170)﹕好好味！個個都讚好！店員話呢道最好賣！油炸鬼脆口，內裡釀入蝦膠，配埋個甜酸汁，好醒胃！有驚喜！
惹娘燒蛋 (NT$100)﹕又一驚喜之作！雖然味道唔及百花油條，但都好好味！
鍾意佢個蛋未完全熟透！
蛋黃瞎子 (NT$220)﹕味道唔錯，用鹹蛋炒蝦，夠香口！
呢餐大家都以為只需二千幾台幣埋單，點知原來要成四千幾！原來餐廳所有嘢同我哋嚟咗雙份，唔怪得份量咁大。細妹講起，我又記得我哋點滷肉飯時，佢有講過嚟雙份，但我哋以為只係滷肉飯嚟雙份，結果佢乜都嚟雙份……雖然，以佢食物質素同份量，收四千幾台幣都唔算貴，但我同兩個妹都覺得餐廳唔太老實。媽媽話係大家溝通有問題，人家以為我哋明白係所有嘢嚟雙份，但我覺得就算之前講咗嘅嘢嚟雙份，我後來多點嘅路邊野雞，佢都唔應該私自幫我加大份量。呢個位，令我同細妹都對間餐廳印象大減！細妹話雖然餐廳嘢食唔錯，但佢覺得餐廳唔老實，決唔會再幫襯！所以，上圖嘅嘢食份量係價錢嘅雙倍！
餐廳評分﹕
食物：好！
服務：一般
環境：一般
衛生：一般
價錢：一般
性價比﹕高
總評價﹕撇除佢哋可能唔太老實嘅話，一定要試！
鼎泰豐實在唔需要我多作介紹，我哋今次去嘅係101分店，因為要就行程，等咗成45分鐘先有位……
因為等嘅時候已經點好嘢食，入座後就只需等食！
油燜筍 (NT$90)﹕味道一般。
炸醬麵 (NT$130)﹕水準普通。
小籠包 (NT$200)﹕從來都唔覺得呢到嘅小籠包特別好食，所以都係覺得好一般。
菜肉紅油抄手 (NT$140)﹕唔好食……
菜肉餛飩湯 (NT$140)﹕唔好食……啲菜肉感覺好散……
空心菜 (NT$170)﹕冇菜味……
肉絲蛋炒飯 (NT$160)﹕啲飯濕咗啲囉。
擔擔麵 (NT$100)﹕少辣，啲麵唔算好食，其實我哋仲點咗個麻醬麵俾爸爸，但唔記得影相。
蟹粉小籠包 (NT$340 x 2)﹕已經食過咁多次，再冇初時食到時嘅震撼了。但仍然覺得好食，嚟呢到都係為咗食佢。
A菜 (NT$170)﹕冇菜味……
紹興醉雞 (NT$280)﹕咁嘅質素收咁嘅價錢，我自己整好過！
酸辣湯 (NT$200)﹕辣！但食得辣嘅大妹佢哋就話一啲都唔辣……都幾足料，但唔會覺得特別好飲。
芋泥大包 (NT$80 / 2 pcs)﹕冇食到，一向唔鍾意芋泥，又甜又滯……
其實我哋仲叫咗豆沙粽子 (NT$70)同埋酒釀湯圓 (NT$100)，不過冇影到相……前者我只食咗一小啖，加上本人唔好紅豆，所以不予置評，後者冇食到，所以都係冇嘢好講。
埋單NT$3311，性價比低！
餐廳評分﹕
食物：一般
服務：一般
環境：一般
衛生：一般
價錢：一般
性價比﹕低！
總評價﹕唔好試呢間！
位於雙連捷運站嘅食店，餐廳有兩層高，位置十分足夠！
我同拾爺就做先頭部隊去攞位，人齊坐好後，就點嘢食，叫咗﹕
牛肉捲餅 (NT$80)﹕芝麻好香，層皮好厚，略嫌硬咗啲，啲牛肉餡乾得滯，唔覺得好味。
牛肉餡餅 (NT$30 x 5)﹕唔特別好食，咬咗兩啖就俾拾爺包底。
燙青菜 (NT$40)﹕啲菜唔靚！
紅燒半筋半肉麵 (NT$190)﹕媽媽之選，冇食過，唔知好唔好味。
綜合拼盤 (牛筋、牛肚、牛肉) (NT$200)﹕大妹一食就讚話好入味，但我同拾爺只係覺得好鹹！><
蕃茄半筋半肉麵 (NT$205)﹕2012冠軍牛肉麵！蕃茄湯底幾開胃，麵質亦有咬口，牛肉唔韌，唔錯！
上品清燉牛肉麵 (NT$210)﹕2006冠軍牛肉麵！幼麵唔係我杯茶，湯底唔覺得鮮甜，牛肉係就係好淋，但完全冇牛肉味……
埋單NT$2320。各人都覺得呢到嘅食物水準好一般！
餐廳評分﹕
食物：一般
服務：一般
環境：一般
衛生：一般
價錢：一般
性價比﹕一般
總評價﹕可以唔試
80後窮遊世界 