一早睇中Jack Wills某件hoodie，但折實都要$510，有啲貴……不過，Standard Chartered做緊優惠，喺Harbour City單一消費滿$500，可以換到$25嘅Starbucks coupon，星期六更多10%回贈，咁件衫即係$460加送多$25 coupon，感覺好好多！所以，我今日赴舊同學約前，專登出尖咀，為嘅就係去買件hoodie，再換coupon，哈哈。本來我上次試完，係想買中碼，但想要嘅顏色斷哂碼……唯有試細碼啦，發覺原來細碼個膊位仲fit，於是即時扑鎚買細碼。
番娘家前，先到又一城嘅Adidas Women拎番退款，我仲見到經理口中已被解僱嘅員工喎，可能未last day啦，拎錢後，又同拾爺去Jack Wills睇吓嘢，拾爺試褲時，俾我見到件男裝hoodie幾唔錯，尤其係價錢，於是拎俾拾爺試，褲因為冇size，買唔到，但就買咗件hoodie，盛惠$370，點解男裝平過女裝咁多架﹖！
去旅行時，可以同拾爺嚟件情侶裝了，yeah ~~
話說我上個星期日去咗Adidas Women到拎番差額後第二日收到Adidas嘅reply email，對方叫我講番個invoice number同分店名俾佢哋跟進，我就覆佢哋已經拎番退款，但就表示自己其實唔想用正價去買另一件hoodie，仲留埋個電話俾佢哋打俾我。
上個星期二收到Adidas嘅回覆電話，對方話會pass件事俾分店經理跟進番，其實我唔想再同嗰間舖嘅人接觸，唔想再見嗰個salesperson，但customer service嗰邊話佢哋都要了解係咪員工冇跟公司policy做嘢，佢哋自己都要跟進。
番到屋企，我阻止拾爺去洗件hoodie，in case對方真係俾我退番，洗咗就真係冇錢攞得番架喇。
等等等，以為Adidas Women嗰邊唔會打嚟，點知今日就收到佢哋電話，個經理好爽快咁答應俾我refund，因為佢覺得係自己員工冇跟指示，要求咗我俾錢在先，係佢哋唔啱。經理叫我拎番件衫去分店就得，就算我已經冇咗張單都ok，佢仲因為要我走幾轉而同我講唔好意思添。我多口問句上次啲錢係咪公司出，而唔係salesperson出，佢話係公司俾番嘅，我都安心啲，但佢同我講個salesperon已被解僱時，我嚇到「吓」咗一聲，對方即刻表示係該員工喺事件前已請辭，咁都好啲，我只想拎錢，唔係要搞到人工都冇得做架！
呢件事今次真真正正地得到圓滿解決喇！
臨近新年，IT旗下店舖又做promotion，喺其中一間舖頭買嘢，憑單可以到其他分店享半價優惠！當然，呢個半價係有上限架啦，價錢唔可以超過之前嘅消費，即上一單如果係$500，顧客就可以憑單到其他IT旗下分店以半價優惠買$1000以下嘅嘢。呢個promotion其實上年都有，但我同拾爺買嚟買去，都係去IZZUE買……張單唔可以用番喺同一店舖，而且只有3日有效期，結果，我係白白浪費哂啲優惠……
噚日，同拾爺去行街街，佢喺IZZUE睇中咗兩條運動褲，打算買嚟當睡褲，呢排IZZUE做緊買四件有4折優惠，於是，我倆努力搵嘢買，本來喺葵芳分店都揀好哂想買嘅嘢，但點知拾爺睇中嘅其中一條褲冇佢個碼，我哋唔想未試就俾錢 (見過鬼，怕黑了……)，寧願搭車番青衣去試。去到青衣，拾爺搵到要試嘅褲，亦試啱，但係……呢到冇我本來打算買嚟湊數嘅belt賣……個sales話因為佢哋間舖本身冇賣belt，所以唔可以幫我要求由葵芳transfer件貨過嚟……好彩，拾爺試褲時，俾我發現呢到有拾爺著開嘅橫條衫賣，拾爺隨即揀番條嚟湊數。基本上，橫條衫可算係我哋每次嘅湊數對象！尤其當IZZUE再冇打底賣時。加埋我件灰色線衫，四件價4折後，$854.4。拾爺買嘅褲，其中一條都幾厚，可以帶去韓國著！俾錢後，sales同我哋講拎住張單去IT旗下嘅其他店舖買嘢，$1710以內可享半價！上年我錯過呢個優惠，今年我誓要用盡佢！
今日放學後雖然要開會至5點45分，但是晚唔駛番奶奶到食飯，我放學即走，去咗附近嘅Chocolate睇吓啲衫！須知道Chocolate除咗嗰啲咩staff sales之外，基本上係全年唔減價架！所以有半價coupon，一定係去Chocolate買嘢！行完一round，冇嘢睇啱……正打算走時，俾我發現佢啲運動褲唔錯，原價$459我當然唔買，但半價之後個價錢就好吸引！試完後，決定買淺灰色同藍色各一，當睡褲著。同sales confirm啲貨後，見到啲底底，於是就問sales我張半價單包唔包底底，一聽到包，即買兩盒！$159六條，平過買Triump同Muji！Sales知我有張半價單，就提議我買襪，我對女裝襪興趣不大，去咗男裝部執咗pack俾拾爺，行番去女裝部時，俾我發現有另一款運動褲，個cutting啱我去街著，仲有黑色添！於是，又拎入去試，最後，我放棄原先要嘅藍色運動褲，只要淺灰色嗰條，新發現嗰款就要深灰同黑色各一。因為我quota有限，所以放棄咗買俾拾爺嘅襪，亦唔受sales所氹買男裝底底駛夠一千，三條運動褲加兩盒各3條底底嘅set裝，最後以$847.5埋單。
我去旅行又有運動褲著啦~~~
等極都等唔到樂古齋嘅回覆，前日忍唔住send去英文個email address，噚日就收到佢reply，但個價錢貴到嚇死人！完全同個官網報價不一！於是，我再send email去問，原來對方報咗首爾嗰間嘅價俾我，我再睇佢個webpage，原來人家有要求reserve河回要講明，係我錯！我overlook咗，冇講明……對方再報價，價錢吸引，但吸引到我懷疑佢唔記得咗我係3個人，因為佢連我個入住日期都搞錯咗……結果，對方真係以為我得兩個人，3人房被人reserve咗，無緣一住了……住唔到樂古齋，即係到河回無望了……
放學後，拾爺打嚟話陪我行街，開心！上個禮拜太遲去一田，結果$50 coupon被換哂……今日同拾爺一會合就去一田，都未夠5點，但coupon又係冇哂……收銀姐姐話4點已經被換哂喇……一田冇coupon換，我哋就先行吓商場。行咗兩、三間舖，我肚餓，於是就入去王家沙食tea，當埋今晚dinner架喇，食飽飽，就去niko and ……到買嘢，上次嚟已經睇中咗條頸巾，但就唔知買藍色好定芥辣色，今次有拾爺陪我，佢幫我揀咗要芥辣色 ($164.5)，再買多頂同色冷帽 ($140)，旅行裝備又多兩樣，yeah ~~
話說我星期日喺Adidas Women’s Store到買咗件褸，點知星期五同拾爺行另一分店時，見到件褸大減價！我連件褸都未到手，佢就勁減$450，我當下嬲到噴火！於是，就打電話去訂咗貨嘅Adidas Women’s Store到問佢可唔可refund番個差額俾我啦，因為我真係連貨都未收到架嘛，點知對方用唔多友善嘅語氣同我講﹕「小姐，妳俾哂錢架喇！」，仲要係兩次咁多！我再三confirm佢公司係唔會refund俾我就收線。
收線之後，越諗越唔忿氣，雖然拾爺都覺得我唔可能要求人家退番差額俾我，但就因為對方一句﹕「小姐，妳俾哂錢架喇！」，反而remind咗我當日俾錢時，我係要求過只落訂，但個sales就叫我俾全數。係佢要我俾全數，然後而家用呢樣嘢嚟打發我﹖！我真心覺得被trapped！
太嬲嘅關係，我番到屋企，第一時間喺Adidas個official website到留言，將件事寫咗出嚟，如果佢哋唔跟進，我打算向消委會到投訴佢哋銷售手法有問題！
噚日收到Adidas Women’s Store來電話到貨，仲問我幾時嚟拎，我感覺好奇怪，平時啲舖打俾我叫我去拎貨，係唔會問我幾時去架囉！我唔去住，我要等佢哋official覆我！
今朝一早，先打去其他Adidas嘅分店到，問咗兩間，confirm佢哋公司policy係貨到先收錢，hold貨連一個仙都唔駛俾住後，就再打去Adidas Women’s Store同個sales理論，佢最初一再以我買時係正價嚟同我講，但我搬出佢公司policy係貨到先俾錢，我因為佢要求俾全數，而未能取消hold貨，再以減價價錢去買嚟回應佢，佢就同意refund番啲錢俾我啦。因為我買件褸時，同時買咗件hoodie，所以店方會先扣起之前俾咗嘅9折嘅差價，我實收番$259。其實，如果唔係兩件貨有9折，我係唔會買件hoodie架，更加唔會用正價去買，而家咁樣，我變相要用正價去買hoodie！不過，做人嘅嘢，得些好意須回手，我都唔想去到咁盡，可以拎番少少，就豪件衛衣俾佢啦。
本來今日同拾爺係要努力改嘢，但唔想再拖住件事，所以特登搭車出去拎褸 (真係車錢都蝕埋，本來噚日番娘家可以順便拎埋，但噚日未諗好對策，所以唔拎住……)。去到，佢要收咗我張單，但我件hoodie用正價買，我要求要有單，搞咗一輪，佢就俾我拎番張單走。但隔咗一陣，又打嚟話要拎番，仲話啲錢係佢自己出，要同公司交待云云，佢亦承諾我件衫有問題，可以拎番去換 (老老實實，我已經唔會再相信佢哋講嘢！)，拾爺話我可以唔駛理佢，但我心知自己唔會再番去換嘢，費時佢不停打嚟，就拎番張單俾佢喇。
呢件事擾攘咗我3日，終於得到圓滿解決，我個人即刻開心番哂！
噚日同同事食飯，講開我買咗香港快運機票，佢隨即分享佢朋友嘅故事俾我聽，原來佢個friend都試過遇到快運喺佢哋前往機場途中先send message嚟告知航班取消，結果，佢個friend要自己用錢買機票飛。聽完佢咁講，我又再擔心過……然後，原來師姐都買咗快運，又係新年期間去韓國，不過，佢係through專業旅運買嘅，我覺得有起事嚟，都叫有間agent負責，唔同我，我係自己上網買嘅……講講吓先知，原來連亞曼達都買咗快運，不過，佢係暑假先出發，又係去韓國。同事話買快運提議嘅旅保可以確保坐到另一航班，我一番到屋企就即刻上網睇保單detail，但就唔見佢有寫……
今日再問該位同事，原來佢個friend要自己俾錢買機票係因為佢趕住回港，唔想坐快運安排嘅另一航班。咁即係快運係會安排另一航班，而唔會就咁取消食咗乘客啲錢就算，咁都好啲。女副校安慰我旅遊時間屬新年期間，航空公司應該唔會因為唔夠乘客而取消航班。
再同另一位成日去旅行山嘅同事講我嘅憂慮，佢提議我買Prudential嘅旅保，話好似因為航空公司cancel flight而有所損失都保。聽完佢講，我又安心少少，不過，我會先搵我宏利個agent，睇吓宏利個旅保係點先。
無意中發現樂古齋嘅官網，佢位於河回嘅房價俾我之前搵到嘅要平，重燃我想到河回一遊嘅希望。我send咗個email去問佢哋房間嘅availability，如果真係有房，價錢又真係如網頁所示，我估我真係會去！
噚日一點準時番到屋企，為嘅就係搶Hilton個半價優惠，但未夠一點，人家個server已經down咗！我狂load兩個半鐘，都入唔到去，決定放棄！出去同拾爺食個tea好過。
食完tea番屋企，Hilton個網頁回復正常，睇嚟啲人搶完喇，拾爺批死我唔會再執好任何嘢，佢錯喇！我真係揀到我想住嘅酒店，真係平足一半！不過……酒店要收附加費，計計埋埋成千六蚊晚，雖然，以佢貴為5星酒店，加我哋3人入住，呢口價都仲好抵，但我最後都冇book。因為，佢冇得免費取消，我真係仲驚緊快運會取消航班，book太貴或者冇得取消嘅酒店，成本太高！同埋呢間酒店冇free Wifi，要上網就要俾錢！去旅行，冇得上網好唔方便！我唔係嗰啲無時無限都要自拍，或者去個洗手間都打status嘅港女，但我需要知道天氣如何、景點同餐廳資料等等。當然，呢啲嘢我出發前會做足準備，但去旅行，好多時都未必可以跟足之前plan好嘅行程，總有有所調動嘅可能，有得上網，方便好多！
放棄Hilton，我同拾爺又要做吓research，睇吓邊間酒店好！但揀酒店前，先要決定去唔去安東河回村。其實，我係好想去呢個有成6百幾年歷史，且被列份UNESCO嘅村落，如果只得我同拾爺兩個，我係一定會去住一晚架！但而家帶埋奶奶……實在唔想佢老人家玩得太辛苦，雖然之前同奶奶提過，佢話冇問題，但因為呢條村交通始終唔及大城市方便，我哋又踏正凍到癲嘅二月去，如果到時要等好耐車，都怕凍親奶奶。村落又咁傳統，雖然室內會好暖，但入到去有幾凍都真係唔知，唔想冷壞奶奶。仲有一個大難題，要住喺村入面，就一定要搵民宿，村嘅民宿大部份都殘舊，而且只得公共浴室，我睇過有台灣背包客過一月入去住，喺室內就冇問題，但要出去去個洗手間，就要鼓起好大勇氣，衝出去捱凍……當然，我同拾爺係受唔住公共浴室嘅，帶埋奶奶更唔會去住，所以我係target at有private bathroom嘅民宿，但全村只有兩間，咁矜貴，價錢當然唔會好friendly啦。我check到其中一間叫「樂古齋」嘅，3人房收接近$2400，拾爺聽到後嗌貴！我都覺得貴，但住UNESCO嘅屋喎，我又覺得值！只係……我未知自己係咪真係可以如期出發，呢間民宿要一月尾過數，如果去唔成，就要蝕多$2400住宿，個成本太高！再加埋之前我所講唔想奶奶辛苦嘅原因，我哋最後忍痛cut咗去河回村呢個景點。
不過……我已經搞到拾爺都好想去河回村，所以，我哋會book可以free cancel嘅首爾酒店，如果最後決定去河回村，都可以方便改番酒店嘅check in & check out dates嘛！
同拾爺一齊睇首爾嘅酒店，我呢期都係用Expedia搵酒店多，因為想賺Asia Miles，見佢是日特價係Gangnam Serviced Residences，評分唔錯，住過嘅人都留言讚佢位置好，於是就click入去book啦，網頁以一個非常吸引嘅價錢去吸引我揀佢，但點知click到入去，發覺又要俾稅，又要俾多一個人嘅額外附加費，加加埋埋，就由原先嘅五百幾蚊加到去八百幾蚊……由於價錢都仲可以接受，又係free cancel嘅，我就打算book住先。呢個時候，拾爺問我點解唔用Booking.com，佢一向鍾意booking.com，其實經過北村韓松民宿嘅booking後，我已經唔再係Agoda嘅fans，不過，如果價錢一樣，我仍然會揀佢，因為佢可以儲分做redeem。但我同拾爺一樣，鍾意Booking.com個system多啲，人家show嘅價錢係包哂稅同其他附加費，即係第一眼睇到幾多，最後就俾幾多，完全唔會好似Expedia同Agoda咁，引咗你上釣先再逐樣鋸你！既然拾爺咁問我，我就即管睇吓Booking.com個價係幾多，最後發現有最低價格保證嘅Expedia貴人成三百幾蚊！雖然，我可以照book兩邊，再要求Expedia賠番差價嘅雙倍俾我，但……我實在冇咁嘅精力去賺佢三百幾蚊，最怕係好難先拎到呢筆錢，既然Booking.com平啲，就喺Booking.com到book啦！
Book完房後，我貪得意再番Expedia到睇，見到佢房價平咗，於是就再book佢，然後cancel Booking.com個booking，但係……當我收到confirmation email時，發覺佢寫咗我係兩個人入住……我search時明明係填3個人，揀嘅又係3個成人嘅公仔……為免最後連呢到都住唔到，我再喺Booking.com book番間三人房先，然後今朝一早打去Expedia問佢可唔可以轉人數。對方話唔得，於是我就要求cancel個booking，佢話會退番錢俾我。我同佢講佢哋個價高過Booking.com，佢就講一次個差額賠償嘅condition俾我聽……我當然知啦，但我真係唔得閒去book一次佢哋間貴房，俾佢哋收一次錢後，再叫佢哋退番俾我，我怕貪字得個貧呀！知道Booking.com平啲，就直接去Booking.com book算啦，人家明碼實價，頁面又夠user friendly，free cancel就真係free cancel，好用好多！
都唔明點解呢排book酒店都咁諸事不順！之前去歐洲book酒店，間間都冇問題，係韓國呢次咁多問題……可能之前主要book兩個人，咁次book三人房真係煩好多！
噚日book完釜山住宿，就再book埋首爾頭兩晚住宿。之前睇「超齡打工假期」，見到Dodo姐同王苑之住嘅傳統韓屋好靚，好想住吓，於是上網搵資料。原來佢哋住嘅地方叫「北村韓松民宿」，但網上搵唔到呢間民宿嘅資料……我只搵到另一間個名差唔多嘅，叫「北村韓屋民宿」。因為價錢唔平，所以我哋只住兩晚。我見Agoda嘅網頁顯示我哋想入住嘅期間，佢哋尚有一間單人房同一間雙人房，於是想一次過book哂兩間房，點知個system唔俾，要我逐間去book……Ok，咁我先book咗間兩人房先！成功收到佢哋嘅confirmation email後，我就再book單人房，點知……入哂資料，click confirm後，網頁突然話技術故障，要我重新入過……Ok，再入囉！點知……佢唔俾我book，話冇哂房……我同拾爺當堂灰哂！因為我真係好想好想好想住，於是，拾爺努力上網睇資料，發覺呢間民宿其實位置都方便，唔可以一到首爾就住，我哋決定改為最後兩晚先住。雖然網頁講明係free cancel嘅，但之前Expedia都係咁寫，我confirm咗個booking，過埋數後，佢又表示佢哋唔收我錢，但酒店有機會會有charges，搞到我唔太信free cancellation呢兩個字！所以，我唔敢貿然改我個booking，打算先send email去問。
今朝一開email，Agoda已經回覆我，話我可以免費改入住日期。於是，我上網見到最後兩晚民宿有單人房，亦有雙人房，仲有三人房後，就先改入住日期，收到confirmation email後，就再reserve一間單人房，點知……system顯示所有房經已reserved……有冇咁邪﹖每次我要book房就有人同我爭﹖！算，我book間3人房。
Book完3人房之後，我再睇個網，發覺之前想入住嘅日期又有房，於是就再book間單人房俾奶奶，但當我想將之前book咗嘅兩人房再轉番頭兩晚嘅日期時，個system down咗……之後，間房又係冇咗……我開始懷疑其實由頭到尾都冇人同我爭房，係我自己同自己之爭！即係，民宿從來只剩一間細房，一人入住，佢就收一人價，兩人就收兩人價，但因為同一間房可以俾一人入住，又可以俾兩人入住，所以網頁就兩個options都話available，但當我reserve咗一間後，民宿冇哂房，所以我就reserve唔到另一間喇。Whatever，我點都叫reserve咗一間三人房，叫做住到北村韓松民宿。以為可以安心另一間位於首爾嘅酒店啦，點知……收到三人房嘅confirmation email後，發覺佢寫咗我係一人入住……我send email去要求改，對方同我講要每晚俾多W50,000，我覺得好ridiculous，我揀嘅明明係三人房，房型同二人房一樣，但價錢就貴一截，我以為呢個價已經反映咗三人入住嘅收費，點知唔係……我唔服，send email去質問Agoda，但對方只答埋啲bullshit俾我，仲話自己寫得好清楚……我真係唔太睇到囉！首先，佢冇位俾我輸入住人數，咁即係我只可以靠佢offer嘅option，揀每房人數限制嘅房型，而我揀嘅房寫明可以3人入住，嗰三個公仔仲要係成人，唔係兒童，然後兒童加床先收錢，又冇講明第3個成人入住要收錢，咁點叫清楚﹖！不過，我計過加埋additional charges之後個收費，其實又同一間單人房加一間雙人房差唔多，Agoda方面根本就九唔搭八，啲英文寫到一嚿嚿咁，再同佢爭持都冇意思，咁就算喇。
80後窮遊世界 