今日留番喺釜山，只係去兩個點，本來行程鬆動，可以遲啲起身，但民宿早餐時間只去到9點半，即係我哋平時食開嘅時間，想瞓晏啲都唔得，仍然係要7點半起身……
落到下面食早餐，呢兩日坐開嘅位置俾對香港嚟嘅couple霸住咗……唯有坐過另一張枱。
是日熱點﹕三文治，內有煙肉同蛋，雖然好唔健康，但好好食！
食完早餐，走去問問酒店staff由釜山去首爾嘅交通，我一直以為由釜山搭火車去首爾係要去釜田地鐵站搭KTX，原來唔係釜田站，係釜山站先啱！好 彩多口問一句咋！然後，酒店個staff知我哋未買火車飛，就提醒我哋佢哋春節假期去到年初二，所以聽日會有好多人由釜山番去首爾，我哋未必買到火車 飛……佢建議我哋搭巴士。但我唔想搭巴士，去洗手間冇咁方便之餘，我唔識由巴士站去酒店……酒店個staff話俾老闆娘知我哋想搭火車一事，老闆娘話佢呢 排keep住上KTX個網頁，都買唔到飛，佢話自己都要等到星期一先走到……搞到我勁驚！其實出發前我有問過達人要唔要網上買定飛先，佢就話唔駛，到時先 買。聽佢咁講，我先唔買住。但而家諗諗吓，達人係Christmas去，我而家係新年，佢當然可以唔駛買，我其實係應該要買定先架！唉……都怪我大意，唔 記得呢到都放新年假……老闆娘即時用手機apps幫我哋check，話只有朝早6點幾嘅班次有位剩……我哋打算6點幾都照殺時，佢又check到10點半 班車有位，於是我哋即刻出發去買飛。
因為急住買飛，之後去嘅景點雖然只隔一個站，但我哋冇地圖喺手，唔想到時要奶奶陪我哋搵路，於是我買咗3張一日券(₩13500)。
去到釜山站，跟住指示，行去火車站。上到火車站，拾爺立即去搵售票處，搵到之後，我哋就買飛。但原來10點半班賣嘅係企位……我哋兩個企兩個幾鐘當 然冇問題啦，但奶奶就……我哋問奶奶意見，佢表示企冇問題，總好過6點幾去到車站，於是我哋就買咗3張企位飛(₩150000)。
買完車飛，終於有時間同心情影吓相！
車站售票處
車站大堂
火車站大堂嘅店舖之一，sales一身韓服sell客。
火車站出面
唔知呢啲叫咩花，但韓國好多地方都有。右圖有人玩嘢，放咗張相上去，新年流流，真係「啋」！
喺到我哋見到遠處有金秀賢嘅poster，拾爺終於見到我經常提及嘅金秀賢嘅模樣，但佢卻好不屑地表示唔覺對方靚仔。
出釜山站，要行樓梯上嚟……
我同拾爺捧行李行唔係問題，但奶奶就……好彩呢到距離酒店唔遠，聽酒店個staff講，就算打的，都係₩8100到，聽日豪俾佢！
釜山站嘅用色感覺古色古香。
離開釜山站，我哋搭去土城站，出閘後，即聽到廣東話。我哋要去甘川文化村，出土城站6嘅出口，再轉小巴。
土城站6嘅出口
出嚟後，向前行，前方其實只有一條路。
沿路向前走。
繼續向前行，會途經一所醫院。
過咗醫院後，就會見到車站。(此為後補照片)
我哋向前行，離遠見到架小巴，拾爺第一個向前衝，頭先見到嘅香港人，知我哋都想上小巴，故意拖慢上車速度，等到拾爺跑到過去先上車，非常好人！我同 奶奶緊隨拾爺之後，一上車，發覺全車都係香港人，大家都笑話香港人包咗架車。因為上車後，司機即開車，而架車都幾「凳」，我冇辦法figure out車費幾多，我聽到有香港人話₩900一個，於是就拎咗₩2700喺手。但架車好「凳」，我冇辦法上車俾錢，加上架車又熱到我有少少唔舒服，於是，我 就開始除外套，但除完仍然覺得好唔舒服……呢個時候，有個男人見我唔多舒服，就叫我開開窗，但我已經冇力開窗，個男人就叫拾爺幫我。拾爺今次真唔夠細心， 竟然唔知佢老婆我唔舒服……個男人話見我臉青口唇白，應該係因為頭先跑上車，另一個香港女人即時遞上白花油一支俾我，仲話自己有兩支，叫我keep住佢。 原本以為佢哋兩班人係識嘅，原來唔係，呢架車連埋我哋坐咗三groups香港人。喺異地遇到自己人嘅幫忙，好感動。香港男人叫我先聞聞啲白花油，定一定神 後先搽。
搽完白花油後，個人叫ok少少，然後，就到站落車喇。奶奶同拾爺怕我仲唔舒服，提議我坐一陣先再行，但我反而想行吓，呼吸吓清新嘅空氣。
一落車，就見到呢堆色彩繽紛嘅小屋。
我哋見路就行，完全唔知道一嚟揀錯路，其實呢到有正式入口……
今日係年初一，韓國人都會去拜年架！
行行吓，有本地人見我哋亂行，就教我哋行番上遊客嘅路線，不過，要先行一大段樓梯……
上樓梯……
見到指示牌，終於感受到呢到係遊客區啦！
沿樓梯上，發現另一片天地！甘川文化村以色彩繽紛嘅小屋聞名，但呢到除咗有彩虹屋，仲好有藝術氣息。
髮型屋
行行吓，喺某個供遊客影相位到，撞到頭先一齊搭車嘅香港男人同佢太太，佢offer幫我哋揸機，但其實嗰個供人影相嘅背景一啲都唔靚，所以我哋話唔 駛喇。然後，我見到隔離有印仔俾人chop印，於是就拎本passport出嚟chop，個香港男人見到我咁，就提醒我可能會被入境處嘅人質問嗰啲係咩嘢 印，原來佢有friend試過係咁，但我本passport chop滿台灣、瑞士等景點嘅印，未試過被人質問喎……
聽個香港男人講，呢到有幾處俾人chop印嘅地方，有遊客會專程嚟儲印仔。
呢間屋入面展示咗啲藝術品。
離開前先發現，原來我哋打算走嘅出口，係呢到嘅入口……呢到一入嚟就有tourist information centre，遊客可以用₩2000買一張地圖，然後跟住條路線嚟行，地圖上仲有空格俾遊客chop呢到嘅印呢！我當然冇買啦，都行完喇！
Tourist information centre
呢到先係入口……
今日有唔少人著住韓風去拜年
由入口出去，行前幾步就見到頭先落車嘅車站……天呀，點解我哋會行咗相反方向﹖！因為頭先暈車浪，加上車程短，我同拾爺決定行去地鐵站。
同香港一樣，新年期間，啲人亂咁泊車……我哋條行人路變得好窄……
呢到嘅人好興將垃圾包好放哂出街……之前喺南浦都見過架喇！
見到唔少呢啲一份份嘅嘢食，擺得好整齊，唔似係用嚟餵貓狗，我哋懷疑係類似拜土地公嗰類用途。
番到土城地鐵站後，再搭一個站到札嘎其站 ，我哋下一站要去札嗄其市場搵食。
呢到有魚市場，所以就連扶手電梯旁都以海鮮為裝修主題。
出地鐵站後，要行一段路先到魚市場。
見到海鮮檔就知已經到喇！
札嗄其市場同機張市場一樣，除咗海鮮檔，仲有售賣其他貨物嘅小檔。
醬蟹都有得賣呀！
市場一邊係裝修企理嘅海鮮餐廳，另一邊就係呢啲地下濕答答嘅小檔。每檔都有至少一個阿豬媽住陣。
好多檔都有人煎魚！
亦有好多檔有阿豬媽處理鰻魚。
除咗海鮮檔，呢到都係檔口賣其他熱食，我哋喺到撞番頭先個香港男人同佢太太，佢哋啱啱食完，話好正！傾傾吓，佢問我哋有冇興趣一齊食蟹，因為佢哋得兩個人，怕食唔哂，我哋表示前日喺機張市場食過喇。
行到咁上下，又係時候搵食！本來想去札嗄其大樓到開餐，貪嗰到用餐環境舒服啲，但點知……是日大樓冇開……
札嗄其大樓
年初一休息……
唯有行番入露天魚市場搵食啦，奶奶講明唔要再以韓式坐法用餐，我同拾爺就以呢個為揀餐廳嘅首要條件，其次就係睇價錢同客量。搵餐廳時，有個阿豬媽好 熱情咁sell我哋入去坐，熱情到搭哂我兩邊膊頭……其實我好唔鍾意被陌生人掂我！仲要呢個阿豬媽對手之前都唔知掂過乜嘢海鮮，我好介意佢整污糟我件外 套！
最後見到一間人氣比較多嘅，就向餐廳嘅人表示要坐枱，對方叫我哋稍等5分鐘。5分鐘後，入去開餐！(詳見제일횢집)
食完飯，就向南浦出發！本來我哋買嘅係一日券，搭一個站過去都得，但眼見前方就係位於南浦嘅樂天百貨，冇理由咁近都南浦唔行啫，於是，我哋就決定行過去。
呢到好似係另一個市場，不過就全部攤檔都休息。
行去南浦，沿路只有好少商舖開門。
唔知邊個魚市場嘅正式入口
越接近南浦一帶，就越熱鬧。大部份店舖都有開門。行經一個阿婆擺嘅攤檔，見到啲襪只賣₩1000，本來睇中一對貓貓襪想買，奶奶仲教我用手去度吓對 襪係咪真係啱著，confirm阿婆真係₩1000時，錢都拎埋出嚟想買，但拾爺反對，於是我就放番低，阿婆即刻嬲到用掃喺我哋臉前掃貨，再用一大堆我哋 都聽唔明嘅韓語嚟鬧我哋……初一流流被人鬧，心情真係唔多盞，當然，我明白我哋係搞著人嘅……我係唔明白點解拾爺成日反對我買呢樣同買嗰樣，我嬲佢累我俾 人鬧多啲囉！
熱鬧嘅南浦
是日戰利品﹕scarf (₩24000)
釜山塔
大雄好威呀！哈哈！
發現上龍頭山公園之路！點解兩日前我哋睇唔到……
行到咁上下，我哋就落地鐵站，本來想去番海雲臺，食我哋前日因為太飽而冇試到嘅韓牛餐，但拾爺數站後發覺要搭好多個站，奶奶一聽到要搭差唔多成個鐘 先去到就耍手擰頭話唔好去……拾爺表示佢都唔想搭咁耐車去，咁佢兩母子都咁講，唔通我仲堅持要去咩，雖然，我真係好想去試嗰間政客名人都會幫襯嘅餐廳，雖然，拾爺知我想去，係願意陪我去嘅，但奶奶唔想，我都冇得揀架啦，唔通真係為咗一己之私而搞著佢老人家咩﹖！唯有留喺南浦到食囉……失望我一定有架喇……好彩我哋買嘅一日券，如果唔係，入完閘又再出番閘，就會蝕一程車 錢架喇！
上番地面，拾爺問我食咩，我當然唔俾任何意見啦。行入一條頗多餐廳嘅街，拾爺先睇吓餐廳主打咩菜，再望價錢同食客數量，本想食炸雞，但同個waitress雞同鴨講咁，最後入咗間座無虛席嘅餐廳食晚飯，入座前，我哋都要等一等呀！(詳見오보레)
離開前，發現一間好貼心嘅餐廳。
食完飯，番酒店執行李，準備明天向首爾出發！
80後窮遊世界 
Leave a comment