仍然係7點半起身，8點半落樓食早餐，入用餐區前，先同酒店個staff講聲想要佢哋幫忙call taxi去火車站，佢問咗我哋火車時間後，就提議我哋9點半出發。
入到餐廳，但見今日好多人……我哋連二人枱都冇，要坐bar枱……好彩食食吓，有人走，我哋有番張細枱用。今日有幾枱都係香港人呢。
是日熱點，又係omelette，老闆娘落埋場幫手添，佢見到我就話知道我哋買到火車飛，話我哋好lucky，我話只有企位，但都好過冇，佢話由釜山去首爾會有幾個站，有啲人可能係中途先上車，所以我哋可以攝吓位嚟坐喎。
食飽飽，上樓拎行李，一落樓，的士已到，交低鎖匙，同酒店啲人講聲goodbye就上的士喇。
未夠10點，我哋已經到達火車站，車費為₩5800。不過……頭先架的士又係好焗，我已經開咗少少窗，仍然焗到唔舒服……落車後，拾爺幫我拉咗一陣行李。
入大堂後，拾爺去咗睇邊個platform上車，之後，大家都去一去洗手間。然後，拾爺怕搭車時會肚餓，去咗買麵包。
我哋班車喺platform 10。
麵包 (₩3500)﹕到咗酒店時先補影嘅，原來入面有cream，拾爺唔鍾意，但我愛！
等緊拾爺買麵包番嚟時，奶奶問我平時係咪咁唔搭得車同成日頭暈……我話俾佢知細個仲唔搭得車，由樂華村搭去石硤尾都嘔，而家好咗好多架喇！至於頭 暈，應該係因為呢排正值唔方便嘅日子，個人唔夠血，所以先咁。奶奶聽完之後，就話唔知我身子唔好，如果唔係，佢就會煲吓紅棗水俾我補補，佢話番香港後會煲 俾我飲，問我飲唔飲。奶奶對我真好。
等埋拾爺番嚟，我哋就行去platform 10上車喇。
我哋架KTX呀！
雖然我哋買嘅係企位，但車飛都有顯示我哋企邊卡架！所以我哋要揀番啱個車廂跑碼嚟上車。
上車喇。
未來兩個幾鐘，我哋就要喺呢個小小嘅area度過……
早上車嘅好處係，可以霸到好啲行李位，同埋……
座位！原來呢到有兩個座位架！咁即係奶奶唔駛企足兩個幾鐘喇，太好喇！我同拾爺兩個都唔怕企，最怕辛苦奶奶呢個老人家，到時真係不孝喇我哋。
無緣試坐嘅火車車廂……
KTX準時開出，開車後，奶奶見車廂內有空位，就入咗去坐，本來佢有叫我同拾爺都入去坐架，但我哋要負責霸住呢兩個位，萬一有人中途上車，奶奶冇咗 入面個位，都可以出番嚟坐嘛。我同拾爺可以share剩番個位嚟坐，咁樣呢兩個幾鐘都容易過得多！兩個幾鐘嘅車程，我就聽歌、閉目養神，拾爺就睇書，火車 過咗兩個站後，越嚟越多買咗企位嘅人上車，空間感驟減……有人企正我對面同隔離……我坐嘅位就對正上車嘅門口，所以一到站就要起身俾人落車同上車，但同時 又要去背囊霸住個位，免得被人搶去。而奶奶入面個位亦喺第二、三個站後冇咗，要入番嚟。我即時讓出座位，奶奶初時話唔坐，但因為我要去洗手間，於是就叫奶 奶幫我霸位，順理成章地要求佢坐低。我去完洗手間番嚟後，想到我個位多人出入，就叫奶奶坐拾爺個位，奶奶又係話唔坐，但拾爺表示唔想再坐，奶奶無奈就範。
到達首爾站後，我哋先整頓一下行裝，去個洗手間，再搵路搭地鐵。
首爾火車站大堂
因為我哋未買T-money，所以喺地鐵站先買去新設洞站嘅單程飛，第一次用首爾地鐵站嘅ticket machine，都要花少少時間去研究，因為手上嘅旅遊書寫嘅係中文站名，但ticket machine要我哋入英文字頭，我初時搞佢唔掂，好彩拾爺發覺入車站號碼都得，最後成功買到3張飛 (共₩1150，因為買嘅係單程飛，另外仲要俾₩1500作為按金。)
買完飛，入閘，再到月台。首爾站踩住4條線，而我哋間酒店就踩住1、2線，所以可以唔駛轉線。
首爾嘅地鐵，有indicator顯示下個站係咩站，非常好！不過，呢到嘅人可以帶埋貓貓狗狗搭車，就唔多好……咁啱我後面個男人袋住隻狗，拾爺一見到即刻隔開我哋。
到咗新設洞站後，我先發現自己冇mark低邊個出口，但我隱約記得係4號，於是就朝住4號出口行，但因為4號出口冇lift，我哋就改為喺3號出口出。
一出出口，唔覺有酒店……其時唔記得咗自己轉咗出口，拾爺叫我同奶奶睇住啲行李，自己一個行前搵路。我記得網上有人講過酒店好近出口，所以總覺得酒 店就喺附近，於是就望望對面嘅building，然後，我見到”Encore”呢個字，感覺佢就係我哋要入住嘅酒店，於是叫奶奶留低唔好走開，追上去搵拾 爺，叫佢過對面馬路睇吓。
拾爺confirm嗰到就係我哋要入住嘅酒店，我同奶奶就推行李到斑馬線前，等綠燈時，拾爺過埋嚟一齊推行李至酒店，然後，望望酒店前，就係4號出口。
入酒店check in，今晚開始一連4晚，我哋同奶奶分房瞓。酒店個staff同我講國語，我想用英文同佢溝通，但佢話自己英文唔ok……我其實都唔太接受四星酒店嘅 staff唔識講英文……所有嘢搞掂後，就上房放低行李喇。(詳見Ramada Encore Seoul Dongdaemun)
先奶奶到佢房間，約好半個鐘後再嚟接佢一齊出去明洞後，我倆亦番房放低行李。整理好行裝之後，我哋就過奶奶房到，拾爺發現奶奶間房有熱水壺，我哋間房冇……於是，離開酒店前，拾爺交帶櫃枱嘅人拎番個熱水壺去我哋房。
搭地鐵前，先去買T-money，但便利店個staff賣俾我嘅係cash bee，咩都好啦，可以用嚟搭車就得架喇！3張cash bee要₩7500，但入面一毫子都冇……買完之後又要增值，我每張增咗₩10000。
買完卡，落地鐵站可以直接入閘喇！由新設洞站到明洞要喺東大門站轉線，而呢到轉線同台灣一樣，行‧餐‧死！我同拾爺當然唔怕行啦，但奶奶就……喺韓 國做老人家，其實都唔太著數，地鐵站好多時要行到老遠先有扶手電梯，再唔係，就只有樓梯……呢到嘅人又冇乜讓座意識，我覺得呢到嘅老人家應該多數會揀搭巴 士。
我哋酒店位處嘅地鐵站。
嚟咗韓國幾日，可能上次嚟係跟團，今次自由行，深深感到呢到嘅文化係，除咗洗手間乾淨之外，同番大陸係冇咩分別……呢到啲人都可以幾冇公德心！仲 有，我真係覺得呢到嘅人係好nice但冇manner，佢哋嘅文化令佢哋覺得就算條街幾闊都好，我要撞開你嚟行就撞開你嚟行，如果趕時間嘅話，話之你係老 人家都照撞可也！而呢到嘅男人，咩年紀都好，要吐痰就要即時隨地咁做，最後仲要用鞋擦兩擦添！
行去轉線喇！
因為轉線地方大，所以呢到有凳俾人坐，亦有各種各樣嘅商舖。
鐘意呢到嘅地鐵月台會清楚標示上個站同下個站嘅站名，對旅客嚟講係好事！
到明洞後，第一時間搵食！本來我係打算去杜如風喺流行首爾介紹過嘅黑豚家，但拾爺被旅遊書介紹一間食鴨嘅店舖吸引咗去，於是，我哋就改為食鴨喇。
明洞站！
搵鴨店 (食嗰種呀，唔好諗錯隔離！)途中。
捕獲金秀賢……張相。
途經找換店，見個rate都可以接受，於是就入去換錢，照舊我哋換二千，奶奶又換二千，呢到個rate係HK$1兌₩140。
行到咁上下，拾爺見到街上有個易拉架，圖片show嘅正係旅遊書所提嘅菜式，我哋正猶疑上唔上樓望吓係咪呢間餐廳時，有個男人突然出現表示書中所指 嘅餐廳就喺樓上，仲指指書中圖片，再指指影拉架幅圖，表示兩者係一樣添。於是，我哋就跟佢上樓。上到去，見到店舖裝修同書影到嘅唔一樣，個男人就話 change，意思係佢哋裝修過嚟。我哋見menu show嘅嘢同本書嘅都一樣，於是就坐低開餐。(詳見Pho Duck)
食飽飽，就去行街喇。呢到真係好熱鬧，熱鬧到有啲寸步難行嘅感覺……
行行吓，見到有士多啤梨賣，問問價錢₩8000一盒，兩盒₩10000﹖有個講國語嘅女人咁啱走嚟睇，佢問幾多錢，我話聽到阿豬媽話₩10000兩 盒，佢提議我哋夾份買，但點知阿豬媽澄清係₩15000兩盒……之前明明兩次都聽到佢話₩10000兩盒架！佢個5字發音都發得好細聲吓！
雖然才剛食完嘢，但見到呢個蛋糕好似好吸引咁，忍唔住買咗個嚟試！
外脆內軟，好味！盛惠₩2000。買多個俾奶奶，但佢唔太buy，可能佢嗰件隻蛋熟啲啦。
本來想試試石榴汁，但₩4000只得細細包，唔抵！
嚟到明洞，終於買到第一對₩1000襪！
喺明洞，沿途都有找換店，見到有間個rate靚頭先少少，本想再換多少少錢，但奶奶提議頭先換嘅錢我自己要哂，佢而家先換，咁就唔駛番到酒店又再俾番錢我咁麻煩，個rate幾多我唔記得喇，但因為找換店食咗啲零頭，所以同頭先間可能一樣架咋！
色彩繽紛嘅停車場
熱鬧嘅明洞
只招待遊客嘅黑的，據杜如風喺流行首爾講，要做黑的司機必需紀錄良好，喺過去十年都冇被扣過分，佢哋同時又要識講英文，所以，呢種的士收費都會較高。
我見時候唔早，就提議上首爾塔睇夜景。奶奶奇怪點解我六點幾就話要上去睇夜景，因為我心知我哋係要早啲去景點，早啲去開飯，佢兩母子都唔餓得架嘛。
我哋先落番地鐵站，再由3號出口出去。搵3號出口途中見到賣襪嘅舖頭，同奶奶即時去睇去揀去買！又買咗3對 (₩3000)！
搵到3號出口，就向首爾塔進發！由地鐵站到登首爾塔嘅纜車站，要步行一段路，但出地鐵站後，街道上卻無清晰指示……我入咗間5星酒店問人，先識行……
出地鐵站後，尚有牌指示首爾塔方向，然後行到一5星酒店時，就要喺酒店右方嘅道路一直向上行。
呢一頭有唔少民宿，有啲個外觀都幾靚架！但太上嘅就唔啱我哋呢啲拖篋遊客喇。
首爾塔其實就係南山公園內，所以本地人多叫南山塔，而南山公園又有讓情侶扣上鎖嘅地方，所以呢到係情侶勝地，連上去嘅路都好有愛呀！
呢段路都要行10至15分鐘。
行到上纜車站，好‧多‧人！
纜車細細，每卡所載嘅人數有限，人龍卻長，有排都未排到入車站……最可怕係，車站有3層，入面唔知打咗幾大個蛇餅……
排隊時，見對面有路行上公園，於是，拾爺就過對面馬路探一探路。拾爺問咗一個本地人由起點行上去首爾塔要幾耐，對方話半個鐘到。其實，如果唔係同奶 奶一齊，我同拾爺一定唔會搭纜車，我倆都鍾意行路。奶奶知道只係行半個鐘，就話佢都行到。我哋向奶奶再三確認行上去後，就過對面馬路，齊齊行上去。當時， 前前後後仲有一大堆人一齊行呢！大家都被人龍嚇怕。
奶奶原來唔怕行，佢怕黑多啲，所以公園嘅燈一著，佢即時表示安心。
行咗一陣樓梯，就到平路，呢到有間餐廳，仲有洗手間添。
繼續望住首爾塔嚟行，但係……越行就越似落山，個塔亦離我哋越嚟越遠……
拾爺記得我哋之前經過某個位落咗閘，懷疑上塔之路已封，佢一直覺得我哋落緊山，唔係向首爾塔進發緊。我於是就問問路人，問著其中一對couple， 兩個都唔識講英文……我用單字「tower」，再指指個塔，用哂body language去問點上去，佢哋就講一大堆我聽唔明嘅韓文……但我feel到佢嘅意思係上唔到去……就喺呢個時候，有香港人向我哋方向走嚟，話前面上唔 到塔，我哋更肯定自己落緊山。走番轉頭，睇睇個閘，果然，每日下俾4點以後，冇得行上去……
要行上首爾塔，記住要喺下午4點前上去啦。
我哋3個唯有死死哋氣行番落去排隊……拾爺其實冇興趣上去，奶奶就話一場嚟到都想上吓，我當然想上啦，去過Paris同釜山嘅情鎖地，點可以少咗首 爾塔呢一個架！落樓梯前，奶奶想去洗手間，為咗爭取時間，拾爺先落山去排隊。落到去，人龍依舊好長……奶奶表示要排一個鐘就唔上去……
差唔多到車站入口，見到有牌寫住要等70分鐘……拾爺向我發出「噢」一聲，奶奶問佢咩事，佢知一講出嚟我哋就上唔到塔，拾爺怕我失望，向奶奶表示冇事。
纜車站前泊咗好多車，上山嘅馬路亦大塞車……
終於望到個入口喇！
買飛前，繼續排餐死……
等到可以買飛，拾爺留意到老人家有優惠，於是我哋即刻表示有老人家同行，售票員問問奶奶幾歲，passport都唔check就俾咗個優惠我哋，買飛前奶奶塞咗₩50000俾我，話佢請，我話唔要，但佢點都唔肯收番……仲話有剩唔好俾番佢，留嚟食飯用。
成人來回飛₩8500一張，老人飛來回₩5500一張。
買完飛之後，就行去樓梯口排隊上第二層，喺梯間等咗一陣先上到去，去到第二層，又打哂蛇餅……
排排吓，奶奶突然話要去買嘢食，原來佢肚餓喇。我以為我哋頭先咁晏食嘢，應該可以晏啲食dinner，冇諗到奶奶頭先可能冇食太飽，所以肚餓……奶 奶去買咗一包餅同一支水番嚟，用咗成₩2700個。拾爺見到佢買水就問佢點解唔問我哋拎，因為我同拾爺都袋咗水出嚟，奶奶當然唔知，因為佢自己冇帶水，可 能以為我哋都懶得孭冇帶。望住奶奶買番嚟支水，同酒店俾嘅一模一樣，同我哋辛苦孭咗咁多個鐘嘅一模一樣，但就用成差唔多十蚊港幣去買，我同拾爺都好肉赤。 奶奶當然唔會明我哋有幾肉赤，佢從來都好捨得駛。
終於有望上3樓啦！
一上3樓，已經係可以分成兩批等上車嘅隊伍，我哋剛好係第二班最後3個。
因為我哋排到最後上車，所以喺車廂中完全霸唔到有利位置去欣賞首爾夜景……不過，我哋可以第一時間落車。
落車後，跟隨人群向上行，先到鎖滿love lock嘅一帶。
再向上行，見到首爾塔售票處。由於我只想上嚟睇吓夜景同love lock，拾爺一向對上塔冇興趣，奶奶唔想再排隊(其實都唔知人龍有幾長，賣飛地方唔長，但上塔就見唔到……)，所以我哋決定喺到快速行一圈，再去排隊搭纜車走人。
首爾塔
首爾夜景，其實都冇咩特別，哈。
用樽、罐砌成嘅心。
唔少人爭相同佢合照，但其實咁樣係唔會影到樣架囉！
呢到有埋鎖匙收集箱，lock完個鎖就丟條匙入去。
南山公園嘅必影景點！
上到嚟，行咗一圈，影完相，就快快去排隊搭纜車。
走時又要排餐死……
不過，呢round耗時冇頭先咁耐，我哋今次仲要係排頭位入車廂，即刻去霸個靚位！
有啲人真係好討厭，為咗影相，將部機放喺奶奶面前，擋住奶奶視線，奶奶當時都想影相架，但就讓咗個位俾佢。奶奶以為佢只係想影張相，但其實佢拍片，所以我同拾爺就叫奶奶唔好理佢，對方最後就將部機放喺奶奶頭上位置……
落車後，即時行番落地鐵站附近搵食！
有機會再上首爾塔，一定揀行上山！
本來想去食番黑豚家，但又怕去到時餐廳差唔多閂門……拾爺揭吓本旅遊書，決定幫襯。(詳見Kongbul)
食飽番歸，由明洞站跟住地下街嘅指引行到去市廳站，係就係行得幾遠，但市廳站屬1線，我哋喺呢個站上車 (₩1050)，就唔駛再轉線，反正轉線都係行餐死，而家打個和！
搭到東廟站時，列車停低後，冇再開車，然後車廂突然熄哂燈……我哋當然第一時間落車啦，所有人落哂車後，列車就開走咗，我哋要等下一班車……明明下個站就到，點解唔捱多一個站呢﹖！
80後窮遊世界 
Leave a comment