2015 韓國之旅 Day 2

by Muffy & 拾爺 on February 17, 2015

噚晚瞓得好差！酒店房好焗，就算開咗窗，我仍然熱到出哂汗……奶奶應該都唔太瞓得到，我聽到佢成晚輾轉反側，發出嘅聲響亦令到我瞓唔到覺……我最後係拎對耳筒塞住自己對耳仔先瞓到……

7點半起身，8點半落樓食早餐，之前網上啲人激讚呢到嘅早餐好食，令我有所期待，但係……早餐選擇其實好少……沙律唔夠新鮮，梨又唔甜，yoghurt太liquid，熱食唔係我buy嘅嘢……但我都盡量填飽個肚。

是日熱點精選，酒店有兩位阿豬媽負責煎taco，拎咗taco就自己加配料。我食咗兩件！

食完早餐，奶奶先番上房整理，我同拾爺坐多陣，就上去，接埋奶奶一齊出發去海雲臺。行經酒店間離嘅convenience store，入去買T-money，但對方話冇……再去另一間，佢又話冇，只有另一張差唔多用途嘅卡，但我問佢有冇得refund番錢，佢話冇……由於彼此語言不通，我決定唔買。

去到地鐵站，首次用買票機，好彩有中文，我哋要去嘅海雲臺屬第2區，來回票價每人要₩3000，我當時因為冇留意呢個係來回價錢，以為一個人要成 ₩6000，於是就決定買一日券，每張₩4500。當我研究緊部機時，拾爺搵咗隔離搞緊部機嘅叔叔幫手，佢就教我哋(當然唔係講英文啦！)先用隔離部唱錢機，將₩10000嘅銀紙唱成10張₩1000，再入落部買票機到，3張一日券，盛惠₩13500。

我哋住嘅酒店踩正1、2號線，非常方便，搵啱2線閘口入閘就唔駛轉線。

11點到到達海雲臺站，慢慢行去海灘嗰邊。

呢到都有個海鮮市場，不過，我哋打算搭車去機張市場。

雖然而家係冬天，但仍有唔少人好似我哋咁照樣嚟呢個海灘睇望吓個海，影吓相咁。

呢到有好多鴿同海鷗。

有人餵鴒同海鷗。

喺海灘影咗陣相，我哋就轉戰釜山水族館。呢個水族館係韓國規模最大嘅水族館，佔地36000平方米，展示約有250種35000隻海洋生物。入場費為每人₩24000。

釜山水族館

入場後，我哋第一時間去搵企鵝，因為當時剛好係企鵝嘅feeding time。當我哋搵到企鵝館時，已經見到有一大班人圍住哂喺到等睇show喇。

時間一到，就有個韓國妹喺到講解有關企鵝嘅嘢，不過，佢講韓文，我一句都聽唔明……

企鵝

睇完企鵝，我哋就慢慢睇吓其他嘢。

到12點，就去睇餵鯊魚show，當然，呢個show又係以韓語作講解，我哋又係一句都聽唔明啦。

行完水族館，我哋就行番去地鐵站，搵番7號出口搭巴士去機張市場。途經一間銀行，想話入去再換啲錢，點知呢間銀行冇得換……個staff教我哋去另一間。

冇得換錢嘅銀行……

根據個staff所講，再問吓路人，終於搵到銀行換錢，但銀行有好多人等緊……呢個時候，拾爺黑臉，怪我噚日唔一次過換哂佢，佢唔鍾意去旅行時花時間周圍換錢……我好唔開心，因為噚日換錢好方便，冇諗到今日會咁多人。好彩，銀行處理得好快，等咗一陣，就可以換到錢，今次個rate差啲啲 HK$1₩139.24。我哋同奶奶再各換HK$2000，打算番到西面間Standard Chartered先再換多啲。

換完錢，行番去地鐵站搭巴士。喺巴士站等咗一陣就等到181號，上巴士後先知幾錢 (每人₩1300)，搵錢入，入完就有少少暈車浪……我一向唔太搭得車，坐車做其他人會暈……一路搭一路唔舒服，拾爺仲不停問我幾時落車……我鬼知咩，網上啲人只教點搭車，冇講搭幾耐，同邊到落車，我暈到完全冇mood理拾爺。拾爺於是就行去問司機，佢自己靠估咁拼「機張」個音出嚟問，司機示意未到。

又過咗一陣，拾爺又去問司機，司機仍然話未到，然後，有個女人知道我哋想去機張市場，到站後就叫我哋落車，仲帶埋我哋行過去添！我哋都算好彩喇！原先以為司機被我哋問咗咁多次，到機張市場時會叫我哋落車，結果佢冇囉！如果唔係遇上呢個好心嘅女人，我哋都唔識落車呀。

想去機張市場，見到呢間舖就要落車啦！

我哋跟住個好心女人向機張市場方向行。

巴士站都唔近個市場，冇人帶住行嘅話，又要花時間搵架喇……落車先向前行，要行到去圖右嘅黃色building。

見到呢堆牌就要轉入去喇。

去到黃色building到，就望到個市場架喇！

去到機張市場，真係人頭湧湧！呢到遊客唔多，本地人多，大家都忙住辦年貨。我哋行咗一陣，就被海鮮舖嘅人兜搭，第一、二間我哋都冇理會，因為對方英文講得唔好，又近入口，我哋想再睇吓。然後，行行吓又被人sell，今次呢個哥哥仔講到少少英文，佢向我哋介紹佢攤檔嘅king crab同snow crab，仲sell我哋買兩隻snow crab，索價七百幾蚊港幣。雖然對方表示可以俾discount我哋，但我哋當下都冇幫襯，想再睇吓先。行過另一條街，又唔見有太多海鮮檔，大家都肚餓，唔想再花時間去格價，睇多一間後，見價錢都係差唔多，就番去之前話有discount嘅嗰間到喇。今次再番去，我哋表示想要king crab，但原來king crab隻隻都好大，佢拎咗隻過3Kg嘅俾我哋，我話要細隻啲，但佢show俾我睇隻隻都咁上下大……呢隻king crab索價超過₩169000！我當然要求要有discount喇，對方offer₩160000，我仍然嫌貴，佢就話送多隻snow crab俾我哋。我仲唔肯say yes，3個人企喺到商量，奶奶豪爽，表示冇所謂，嚟得呢到就預被人劏，但我同拾爺就覺得一切都要以合理為依歸。我哋一向少食海鮮，尤其係蟹，真係唔知價……對方見我哋遲疑，就表示可以offer₩140000，但就唔送snow crab。拾爺覺得₩20000多隻snow crab更好，於是say yes。我即刻say no，要求₩140000連埋隻snow crab，對方唔肯，表示一定要₩160000先有蟹送，我再R佢₩150000連埋隻snow crab，仲話可以幫佢番香港宣傳，佢話已經有好多香港客，唔駛我幫佢宣傳……我即時表示呢到咁遠，冇乜香港人嚟。事實上，我真係冇聽到有人講廣東話，呢到又真係好遠，我當然知道有香港人會專程嚟呢到啦，但有更多嘅會嫌遠唔嚟。老實講，如果我知道要搭咁耐車，我都唔會嚟！最後，對方 offer₩155000連埋隻snow crab，成交！(詳見機張市場)

食飽飽，離開餐廳前問問人家火車站點去，對方拎張紙畫個地圖俾我哋睇後，收番張紙……好彩，拾爺大概掌握到點去火車站。

老遠嚟到呢到，當然唔會只係食蟹，點都要行一行呢個機張市場。臨近新年，好多人都辦緊年貨，呢到啲人又鍾意撞開人嚟行，我哋真係每步都行得小心，以防被撞……

行完機張市場，本來想話搭火車，因為時間快啲，又唔怕會暈車浪，但因為我哋之前係搭巴士嚟，原路番巴士站，對我哋嚟講比再搵火車站會慳時間，加上去到火車站，又要煩買飛同落車嘅嘢，我哋決定都係搭番巴士走。

巴士站

回程巴士上，我同拾爺都瞓著咗，好彩仲有奶奶，而佢又認到吓路，見差唔多到時，就叫醒我哋，然後，拾爺認得個車站，就帶住我哋落車喇。

行番去海雲臺地鐵站後，我哋搭去Centum City站，嗰到有間叫新世界 Centum City嘅百貨公司，據網上所講，佢係韓國最大嘅百貨休閒娛樂中心，亦係全世界最大嘅百貨公司。

喺呢到，我哋行咗一個鐘到，喺呢到我搵到Didier Dubot嘅counter，仲好似見到「來自星星的你」入面，男主角向女主角求婚嘅嗰隻戒指添！但因為我唔肯定個款，所以冇買到。另外，喺呢個場到，我見到O”Sulloc嘅counter，好想買杯綠茶雪糕食，可惜因為我正值唔方便嘅日子，拾爺唔俾我買……食唔到雪糕，睇吓啲綠茶價位，真係貴到嚇死人！原來三大綠茶產地濟州嘅綠茶一啲都唔便宜……因為遲啲過到首爾，我會去佢嘅tea house到嘆茶，所以而家唔買住。行咗陣超市，但啲生果超貴！臨近過年，呢到又有好多人辦年貨。

因為成四點先去食蟹，3個人又食咗兩隻大蟹，我哋都唔肚餓，應該話係再食唔落飯……我想到龍頭山公園睇夜景，本來奶奶話可以跟埋去，但我怕佢攰，因為我哋去到南浦嗰邊仲要搵路，而且睇夜景嘅地方仲好似要上山，於是我同拾爺就提議先送奶奶番酒店休息，我哋自己去。

奶奶想食水果，於是拾爺就先去超市幫佢買，我負責送奶奶番酒店先，等拾爺番埋嚟，我哋再搭地鐵去南浦。拾爺其實唔讚成再出去睇夜景，佢覺得我要多休息，但我好想去，寵我嘅佢當然要陪我啦。

一出南浦站，突然好迷茫，完全搵唔到去龍頭山公園嘅標示……我同拾爺決定向前行吓先，越往前行，越發覺呢區好熱鬧！其實我當然想book呢邊嘅酒店，但因為心儀嘅酒店冇哂房，所以先改住西面嗰頭。嚟到呢到見到好多商舖，同好多攤檔。同拾爺往上行，感覺再亂嚟都唔係辦法，於是就問路人，雖然語言不通，但因為龍頭山公園本來就以漢字命名，所以人家大概都知我哋想去邊。問咗一個人，知道大概方向後，行咗一陣，再問問兩個年輕女子，點知佢哋一個指向上一個指向下行……之後，佢哋自己傾掂數後，就再教我哋向上行，然後轉右，見到停車場入去。

我哋跟住指示行，由停車場入公園，要上幾多樓梯，沿途又黑，燈光昏暗，沿路只得我倆，其實我都幾驚。好彩，行到上去，終於有番少少人氣。