噚晚雖然已開冷氣，但我仍然瞓到出哂汗……不過，奶奶可能勞累咗一日，所以瞓得比之前好，冇再成晚輾轉反側喇。
都係7點半起身，8點半落樓食早餐，坐番噚日個位。
是日熱點為奄列。
圖右二嘅男子對住供食客取用嘅餐具呻鼻涕，好唔衛生！
食完早餐，出去問酒店個staff搭去慶州嘅交通，雖然我一早查好哂，但都想有人confirm一下。酒店個staff話我哋知佢哋嘅春節假期係由年三十至年初二，所以，我哋今日未必買到去慶州嘅火車飛……佢提議我哋改搭巴士。因為我之前係打算搭火車，喺網上搵到去良洞民俗村嘅交通都係由火車站轉巴士，如果而家改搭巴士，我唔識點去……搭火車雖然貴一倍，時間又要多一倍，但火車站附近有我想試嘅食肆。不過……如果買唔到火車飛，就邊到都唔駛去……所以，我哋最後都係去搭巴士。我知我哋可以搭地鐵到老圃站，再轉搭去慶州嘅長途巴士，但之後點去良洞民俗村，就要靠酒店個staff即時幫我哋上網查。酒店個staff非常helpful，寫低去慶州嘅巴士費，上網查慶州往良洞民俗村嘅巴士站位置，我哋即時影低佢電腦個mon所顯示嘅地圖，佢仲寫埋巴士號數俾我哋添。
另外，因為聽日係初一嘅關係，銀行唔會開，聽個staff講，連埋星期六、日，銀行會下星期一先開門，我怕之前換嘅錢可能唔太夠，於是就先行去渣打銀行換錢先，點知……銀行今日都唔開……算啦，其實手頭上有嘅錢夠我哋去到首爾再換嘅，反正到明洞應該會有好多找換店。搭地鐵去老圃，向慶州出發！今日要去嘅良洞民俗村應該都係冇遮冇擋嘅地方，所以我哋都著多咗衫。
行去地鐵站後，正打算唱錢買地鐵飛時(因為部machine唔接受₩10000紙幣……)，卻搵唔到部機……原來唔係部部賣飛機隔離都有……我哋要 沿住地下街搵先搵到。唱到錢，就買咗3張來回二區嘅地鐵飛(每張₩3000)，我同奶奶入閘後，拾爺卻入唔到……佢張飛有問題！但係……個地鐵站其實有好 多個入閘口，每個入閘口都有一定距離，大部份都冇職員站崗，拾爺四圍搵都唔見有人幫到手……喺拾爺行開咗去搵職員時，我同奶奶就喺閘口等佢，當時有個韓國 男人企咗喺閘口出面，不停望住我倆，我見佢望住我哋，心都寒埋，呢個時候，奶奶竟然想拉我行去個男人到，話佢可能係職員……真係被奶奶呢一著嚇親，個男人 冇著制服，好明顯唔係職員啦！因為奶奶係拉住我行時同我講，我一知道佢想走近個男人，即刻拉番奶奶轉頭，同佢講個男人似係傻多過係職員。嗰個韓國男人見我 哋曾經想走近佢，但又行番轉頭，就望住我哋，嘴角微微向上，笑住咁向我哋招手，示意我哋行埋去……好彩佢冇飛入閘，如果唔係，拾爺唔喺到，奶奶又行得慢， 我哋一定走唔切……
拾爺遲遲未番，個男人仍然企喺出面……其實₩3000都唔算好多，我寧願拾爺快快番嚟，等我俾錢佢(錢係我keep嘅！當然，拾爺都有少少。)再買 過張飛。等得太耐時，我嘗試落搭車嗰層睇吓會唔會見到職員，但都係見唔到……上番去時，個韓國男人走咗，拾爺番咗嚟，但佢都係搵唔到人幫……我俾錢叫拾爺 再買過張飛，壞嘅嗰張就keep住先，遲吓先搵人處理。
拾爺再買飛後，我哋就齊齊搭地鐵去老圃站，去到老圃站，一出閘，就見到有職員企喺到。拾爺走去同佢講番個情況，但對方唔識英文，佢帶我哋去到車站嘅 information centre到，叫咗個後生仔出嚟處理。同個後生仔講出發生咩事後，佢好爽快哋俾番₩3000我哋，然後，佢知我哋嚟自香港，仲用廣東話講咗句﹕「唔駛唔 該。」添。
老圃站嘅information centre
老圃站一出，就已經可以駁去釜山長途巴士站，我哋喺到買咗11:30開往慶州嘅巴士飛 (3個人共₩14400)。因為仲有半個鐘先出車，我哋先行去巴士站搵上車嘅地方，然後就去去車站洗手間。
車站有大型indicator顯示將會開出巴士嘅班次時間。
拾爺負責排隊買飛。
長途巴士站有locker俾佢寄存行李。
我哋架巴士。
巴士站停咗好多車！
差唔多夠鐘，我哋就落番去停車場到搭巴士，一上巴士，拾爺就見到車上有indicator顯示巴士到達慶州嘅時間，之前網上啲人講過一個鐘就到，但而家顯示要個半鐘……
成程車，我都係睇吓風景、睇吓歌，再瞓吓咁過，巴士中途都有塞吓車咁，但又真係如indicator所顯示嘅時間到達。
落車後，我哋先入賣票處睇回程班次時間，鎖定六點以後嘅班次，拾爺排隊問職員如果我哋買咗6點嘅車飛，番唔切嚟可唔可以搭之後嘅班次，但對方聽唔明英文……我哋見之後嘅班次時間都可以接受，於是就唔買飛住，出發去搵巴士搭去良洞民俗村。
回程班次
拾爺排隊問嘢。
一出巴士站，就見到Tourist Information Centre，喺釜山都未見過，但一嚟到慶州就見到。入去問佢巴士飛嘅嘢，對方叫我哋最好買咗回程車飛先，如果miss咗一班，仲可以搭下一班，佢仲話呢 到其實有兩個巴士站，兩邊都有車番釜山，另一邊嘅好似叫”Intercity bus”，如果我哋買唔到呢邊，可以行前少少買另一邊嘅巴士飛，兩種巴士都去相同嘅釜山長途巴士站。
再confirm去良洞民俗村嘅巴士站位置同巴士號數，我哋先番去車站買回程車飛，我哋決定買6點40分嘅班次(3個人共₩14400)，再行去往良洞民俗村嘅巴士站等巴士。一去到就見到架巴士，但巴士上冇人……等等等，想唔到呢一等，就等足我哋半個鐘……
Tourist Information Centre
往良洞民俗村嘅巴士。
等緊巴士開時，我見車站有顯示各站名稱，於是就問坐喺到嘅一個女人良洞民俗村屬於邊個站，因為我手機有save低良洞民俗村嘅韓文名，個女人指俾我睇後，我喺到數站，但佢同我講個牌冇顯示哂所有站名……
等車開等到唔耐煩時，我睇吓其他巴士所到嘅站，有冇重覆去良洞民俗村嘅，個女人知我搵緊，就話我知仲有邊架巴士去，我即刻叫拾爺留意，當我哋打算轉搭其他巴士時，203巴士又開喇喎。上車買飛，每人₩1500。
車程大約半個鐘，之前酒店個staff同我哋講要成個鐘，可能當中包咗等車嘅半個鐘。
一落車，第一時間睇回程班次，我哋決定搭5點鐘嘅巴士番去。然後，突然有個女人同我哋講廣東話！佢話自己要搭車去火車站，但要行番出出面嘅巴士站，叫我哋回程時問清楚車站位置。但我哋睇到呢個車站係有車搭番去慶州長途巴士站架喎！
203巴士班次
由巴士到村口，先要行一段路。
沿途有指示牌
良洞民俗村地圖
未到村口，先有個展館之類嘅東西。
呢到原來有guided tour架！但今日應該唔開……
終於行到去售票處，之前網上有資料顯示65歲以上長者可以免入場費，但個賣飛嘅阿豬媽睇完奶奶本passport後，話要收3個人錢……算啦，每人₩4000又唔係貴嘅。
買到飛啦！
買完飛後，又要行段路先入到村口……
圖中個看更亭有職員駐守搣入場券。
我哋入村後，決定見路就行！其實呢到有幾條路線圖，但我當時冇資料喺手……
今日呢到嘅遊客唔多，可能唔啱season啦，嚟嘅都係本地人，而且係自己揸車嚟嘅。
講少少有關良洞村嘅背景資料，呢條村位於雪蒼山主峰相連嘅山脊同溪谷間，係擁有最大規模同最悠久歷史嘅韓國代表兩班(朝鮮時代的支配階層)村落，特 別嘅係慶州孫氏與麗江李氏兩大戶人家互相合作傳續500餘年歷史嘅村落。村內由多間傳統韓屋、草家屋同埋連綿一片嘅茂盛樹林所組成。喺200年前名門世家 榮耀先祖們嘅生活面貌仍流傳至今，古屋亦保存咗大概有54戶左右，遊客可以一眼看盡朝鮮時代中期各種韓屋具有嘅傳統構造。
2010年7月31日慶州良洞村同安東河回村(亦即我本來打算去住嘅嗰條村……)合併為韓國歷史村，兩村一同列入UNESCO世界文化遺產。呢兩條 村係繼石窟庵、佛國寺、海印寺藏經版殿、宗廟、昌德宮、 水原華城、慶州歷史遺址區、支石墓遺址、濟州火山島嶼熔岩洞窟、朝鮮王陵之後，成為第10個被列入世界文化遺產嘅韓國古蹟。
我哋喺村內邊行邊影相，邊搵餐廳，可惜……行咁耐都唔覺有餐廳，有都唔開……終於，見到有個小檔，雖然只係賣魚丸(佢哋係寫魚丸，其實都係魚蛋嘅 料，但外觀唔同。)，我哋都照殺！奶奶本來唔想食，話要食蛋，啲蛋凍冰冰，見到都唔想食，唔知奶奶嫌啲魚丸串咩，只知佢再唔食嘢，我怕佢老人家個胃受唔 住，到時我哋就係不孝兒媳，所以我同拾爺嚴厲要求佢點都食一串落肚。
小檔
魚丸 (每串₩700)﹕買魚丸串，老闆會附送埋一杯熱湯，雖知係味精嘢，但因為佢夠熱，我同拾爺都一乾而盡。
食完嘢，繼續向前走。呢條村比我想像中大，越行先發現前方又有路。
行行吓，奶奶就叫我哋番轉頭，話怕趕唔切搭5點車，但當時仲有成45分鐘……拾爺對佢講佢會count住時間。
行行吓，發現有路上高處，於是再往上行，喺高處見到呢條村，原來仲有另一邊……但我哋已經冇時間行過去喇……上到嚟，我哋見地面平平，又冇其他人，周圍環境都唔錯，於是就set腳架，影吓3人合照。
時候唔早，要行番去巴士站喇。
夕陽下嘅良洞村份外美麗！
行番出去，先喺展館去個洗手間，再行出巴士站等車。等等吓，竟然見到頭先幫我哋搣飛嘅職員走埋嚟等車，佢雖然不諳英語，但用韓語指手劃腳咁向我哋表示巴士會5點到，叫我哋安心等車，其實，見佢都係等呢班車，我哋都好有信心班車會到。
巴士差唔多5點到達，今次架巴士比頭先殘舊……可能因為咁，價錢又平少少，每人₩1200。搭半個鐘頭車後，我哋就到番慶州長途巴士站。落車後，我 哋即刻行去售票處，想話改搭6點車番釜山，但6點班次嘅飛已售罄……冇得搭早啲，就改為去搵食啦！因為奶奶喺到，我同拾爺都費時行出去搵食，見火車站有餐 廳，價錢同食物都可以接受，於是就走入去醫肚。(詳見Miso Food)
食完嘢，仲未夠鐘上車，外面太凍，我哋都費時行出去，留喺車站嘅室內到等。雖然喺室內，但我仍然覺得好凍……差唔多夠鐘上車前，我哋先去個洗手間。本來以為呢啲車站洗手間衛生程度會比較差，但結果係地面乾，廁格亦冇垃圾，唔係咩靚嘢，但整潔度絕對可以接受。
夠鐘，上車，呢程巴士我哋都瞓哂，車程比去程短，一個鐘都唔駛就番到釜山。
落車後，我哋就即刻搭地鐵番酒店。番到酒店，著多條褲，食粒panadol (因為噚晚唔係瞓得太好，今日又吹得太利害，我個頭痛咗好一段時間……好彩細心嘅拾爺帶咗panadol 嚟，平時我頭痛都會忍住唔食藥，但今次我決定食一粒，等自己舒服啲。)，就落樓。
我哋又搵酒店嘅staff問佢有冇餐廳介紹，老闆咁啱喺到，就介紹咗間餐廳俾我哋，拾爺聽完佢講餐廳有咩食後，質疑過餐廳唔係整韓國菜，但老闆話餐廳嘅菜式係以韓式煮法去做，而且，佢之前介紹過去試嘅住客都讚好食，於是，我哋就不再問，只係信，向該餐廳出發！
拾爺根據老闆喺地圖上mark低嘅位置，好快搵到間餐廳，我哋餐牌都唔研究就入咗去。(詳見월남쌈구이&샤브)
食完年夜飯，滿足地番酒店休息。
80後窮遊世界 
Leave a comment